گرچی کوز و قولاقدن عاجزلیک همده عقلی ضعیف بولگن بالهلر اوچون تعلیم آلیش قیین بولسه-ده، بیراق بلخ ولایتیده بیر گروه یاشلر تعلیم مرکزی تشکیل ایتیش بیلن، اوشبو بالهلر گه اوقیش امکانیتینی یرهتگن.
«بازتوانی معلولین» ناملی مرکزیده بالهلر جسمانی ناگرانلیگیگه قرهمی، اوقیش، یازیش و ضروری کونیکمهلرنی علیحده اصوللر بیلن اورگهنیشگه تلاش قیلهدیلر.
اوشبو تعلیمی مرکز مسئوللرینینگ ایتیشیچه، بالهلر بو ییرده اوچ ییل تعلیم آلگچ، دولت مکتبلری گه تانیشتیریلهدی.
بازتوانی معلولین مرکزی مسئولی رامز یوسفی شوندهی دییدی: «بو ییرده کوزدن، قولاقدن عاجز و عقلی ضعیف بولگن بالهلر گه تعلیم بیریلهدی. اوشبو بالهلر اوچ ییل تعلیم کورگچه دولت مکتبلری گه تانیشتیریلهدی. سکیز آی دوامیده بیر کونگیللی تیم بیلن اوچ ولایتنینگ تومنلریگه باریشگه اولگوردیک. مقصدیمیز ناگران بالهلر ایسدن چیقیب کیتمسلیک دیر.»
بالهلری ناگران بولگن عایلهلر، مذکور تعلیمی مرکز تشکیل ایتیلیشیدن خورسندلیک قیلهدیلر.
بو مرکزده ایم-اشاره تیلی، بریل یازووی و باشقه کونیکمهلرنی اورگنگن ایریم بالهلر، اوز کیلهجکلریگه امید بیلن قرهماقده.
اوشبو مرکز اوقووچیلریدن بولگن فاطمه شوندهی دییدی: «بیرینچی صنف اوقووچیسی من. بو ییرده تعلیم آلهیاتگنیمدن خورسند من. کیلهجکده قولاقدن عاجز کیشیلر گه یاردم بیریش اوچون شفاکار بولیشنی ایستهیمن.»
شو بیلن بیرگه، بلخ ولایتی ایریم یشاوچیلری، بالهلری ناگران بولگن عایلهلردن، ساغلام و ناگران بالهلرینینگ تعلیم آلیش همده اورگنیش حقوقینی تینگ بیلیشلرینی سورهیدیلر.
مزارشریف شهری یشاوچیسی بولگن مریم صدیقی شوندهی دییدی: کوپینچه عایلهلر ناگران بالهلری گه درس اوقیش امکانیتینی بیرمهیدی. عایلهلردن ناگران بالهلریگه هم ساغلام بالهلری کبی درس اوقیش امکانیتینی بیریب و ساغلام شخص صفتیده جامعه گه تقدیم بولیشنی ایستهیمن.»
بلخ ولایتیده بو بازتوانی معلولین مرکزی، مملکتده ایریم ناگران بالهلر تعلیم آلیش ساحهسیده تورلی معمالر بیلن دوچ ایکن، بوندهی بالهلر گه اوقیش امکانیتینی یرهتگن.
