بدخشان ولایتی ایریم مکتبلرینینگ بناسی یوقلیگی، اوقووچیلرنینگ تعلیم جریانینی قیینچیلیک بیلن روپهره قیلگن. بدخشان ولایتیده ایریم اوقووچیلرنینگ ایتیشیچه، بو ولایت ایریم تومنلریده بعضی اوقووچیلر ایسیق کونلرده قویاش جزیرمهسی، ساووق کونلرده ایسه یاغینگرچیلیک آستیده درس اوقیدیلر و بو وضعیت اولرنینگ صنفده دقتلرینی جمعلشگه سلبی تأثیر قویهدی.
بدخشان ولایتی ارگو تومنیده اوقیتووچی جاوید شوندهی دییدی: «مکتبلرنینگ بناسیزلیگی اساسی معمالردن حسابلنهدی. اوقووچیلر یازنینگ ایسیق هواسی و قیشنینگ ساووق هواسیده آچیق هواده قیینچیلیک بیلن درس اوقیدی. اولر بیتشویش درسلریگه دوام بیریشی اوچون مکتبلرده بنا قوریلیشی کیرهک.»
یمگان تومنیده اوقیتووچی بولگن فاروق هم، مکتبلرنینگ بناسی یوقلیگینی بدخشان اوزاق حدودلریده بولگن جدی قیینچیلیکلردن دیب بیلهدی.
اونینگ ایتیشیچه، قیش فصلیده آچیق هواده اوقیش بالهلر اوچون قیین و بعضی اوقووچیلر هوا ساووقلیگی سببلی مکتب باره آلمسلیگی ممکن. اونگه کوره: «دییرلی بیر مینگ اوقووچی بو ییرده آچیق هواده درس اوقیدی، بیر مینگ اوقووچینینگ قیینچیلیگی حل بولسین. چونکی آچیق هواده تورلی قیینچیلیک بیلن درس اوقیدیلر.»
باشقه تاماندن، اوقووچیلر هم، موجود شرایطدن شکایت قیلیشهدی. بدخشان ارگو تومنی «سرایدره» قیشلاغیده سکیزینچی صنف اوقووچیسی روحالله شوندهی دییدی: «مکتبیمیزنی بناسی یوق، خیمهلر آستیده درس اوقیمیز. تورلی قیینچیلیک بیلن درس اوقیماقدهمیز.»
بدخشان یاوان تومنیده مکتب اوقووچی منیر، خیمهلر آستیده درس اوقیدی و کوپینچه پیتلر هوا ایسیقلیگی یا کی ساووق سببلی مکتب گه بارمسلیگینی بیلدیرهدی. اونگه کوره: «مسئوللردن ایستهیمیز بوتوغریده اقدام قیلسین و حاضر بیز آچیق هواده تورلی قیینچیلیک بیلن درس اوقیماقدهمیز.»
اوشبو اوقووچیلر، مکتبلرده بنا قوریلیشینی ایستهیدی.
بدخشان معارف ریاستی مسئوللری هم، بو ولایتنینگ ایریم مکتبلرینینگ بناسی یوقلیگینی تصدیقلهیدی.
بدخشان ولایتی معارف باشلیغی محمد طاهر جواد، حاضرگی کونده مذکور ولایتده ۲۸۵ ته مکتبنینگ بناسی یوقلیگینی معلوم قیلهدی.
او، مکتبلر بناسی بودجه یوقلیگی سببلی قوریلمهگن دیب، معارف وزیرلیگی، سوداگرلر و همکار تشکیلاتلر یاردمی بیلن بو قیینچیلیکنی حل قیلیش اوچون سعی-حرکت قیلهیاتگنلرینی ایتهدی. او شوندهی دییدی: «بناسیز یا کی اجاره حویلیلر، خیمهلر یا آچیق هواده بولگن مکتبلرنینگ جمعی سانی ۲۸۵ ته گه ییتهدی.»
بدخشان معارف باشلیغینینگ ایتیشیچه، جاری ییلده بو ولایت معارف ریاستی بودجهسیدن ۲۰ ته مکتبنی قیته قورهدیلر.
