دایکندی ولایتیده عیاللر اقتصادی چیکلاولر، ایش فرصتلرینینگ کملیگی و کیچیک بازار کبی معمالر گه دوچ کیلهیاتگن بیر پیتده، تسمه کشتهچیلیگی (روبان دوزلیک) صنعتی ایریم قیزلر و عیاللر اوچون درآمد تایش همده مالیهوی مستقللیککه ایریشیش امکانیتیگه ایلنگن.
اولر آز سرمایه بیلن، بیراق اوز مهارتی، محنتسیورلیگی و اجتماعی ترماقلردن فایدهلنیش آرقهلی محصولاتلرینی دایکندیدن افغانستاننینگ باشقه ولایتلریگه و بعضاً مملکتدن تشقریگه صادر قیلیشگه موفق بولگن.
۲۲ یاشلی شکیلا صراحتنینگ ایتیشیچه، تخمیناً بیر یریم ییل اول اوشبو صنعتنی اورگنیش اوچون هرات گه بارگن. ایکی آی دوامیده تعلیم آلگچ، توغیلیب اوسگن جایگه قیتیب، قرینداشلریدن ۱۲ مینگ افغانی قرض آلیب اوز ایشینی باشلهگن. او شوندهی دییدی: «ایشنی باشلهگنیمده، دایکندیده هیچ کیم تسمه کشتهچیلیگینی بیلمس ایدی. اوشبو صنعتنی تنیشتیریش اوچون اجتماعی ترماقلرده صحیفه آچدیم و استه-سیکین شو ییردن مجازلر تاپه باشلهدیم. حاضر هرات، غزنی، کابل، جلالآباد، سمنگان و حتا خارجدن هم بویورتمهلر آلهیپمن.»
بیراق بو ساحهده فعالیت یوریتیش کوپلب قیینچیلیکلر بیلن باغلیق. صراحتنینگ ایتیشیچه، دایکندیده روباندوزلیک اوچون ضرور خاماشیا عموماً یوق و او احتیاجلرینی هرات همده کابلدن تأمینلشگه مجبور. او شوندهی دییدی: «خاماشیانینگ ییتیب کیلیشی بیر یریم هفتهگچه وقت آلهدی. توغریدن-توغری ترانسپورت یولینینگ یوقلیگی، تشیش خرهجتلرینینگ یوقاریلیگی، ایراندهگی اوروش سبب خاماشیا نرخلرینینگ آشیشی و دایکندیده محصولات ساتیش اوچون مناسب بازارنینگ یوقلیگی بیزنینگ اینگ مهم معمالریمیزدن دیر.»
اونینگ ایتیشیچه، بویورتمهلرنی یوباریش هم کوپ وقت و خرهجت طلب قیلهدی، چونکی محصولات اول کابل یا کی هرات گه آلیب باریلهدی، کیین مجازلر گه ییتکزیلهدی. شونگه قرهمی، اجتماعی ترماقلر اولرنینگ سودا بازارینی کینگهیتیریشده مهم رول اوینهماقده. اونینگ فکریچه: «مینینگ بیرینچی مجازیم جلالآباددن ایدی و او ۲۰ مینگ افغانیدن آرتیق بویورتمه بیرگن. اوشه بویورتمه مینگه اینترنت آرقهلی کتته بازار تاپیش ممکنلیگیگه ایشانچ بیردی. ایندی ایسه بو ساحهده اوز شخصی برندیمنی یرهتیشنی آرزو قیلهمن.»
او حاضرگچه، ینه بیش-آلتی نفر قیز گه اوشبو هنرنی اورگتگن؛ اولرنینگ ایریملری حاضر عینن شو یول آرقهلی درآمد تاپهدی.
۱۵ یاشلی مقدس حیدری اونینگ شاگردلریدن بیری دیر. او تخمیناً بیر ییل اول روباندوزلیکنی آپهسیدن اورگنگن و حاضر حیاتی همده تعلیم خرهجتلرینینگ بیر قسمینی شو یول آرقهلی تأمینلماقده. او شوندهی دییدی: «شخصی خرهجتلریمنی اوزیم تولهیمن و اوی-روزغار خرهجتلریگه هم معلوم درجهده حصه قوشهمن. مجازلریمیزنینگ اکثریتینی اجتماعی ترماقلر آرقهلی تاپهمیز. کیلهجکده بو صناعتنی باشقه قیزلر گه هم اورگتیب، اولرننیگ مالیهوی مستقللیککه ایریشیشیگه یاردم بیریشنی ایستهیمن.»
۲۰ یاشلی فرشته هم، تیکووچیلیک ایشخانهسیگه ایگه بولیب، ایکی آی اول تسمه کشتهچیلیگینی باشلهگن. او اوز تجربهسی حقیده شوندهی دییدی: «تیکووچیلیک بیلن بیر قطارده عیاللر کییملری، چادرلر و بیزهک گللرینی روباندوزلیک قیلهمن. بو ایشدن آلگن درآمدیم آرقهلی تعلیم و کورس خرهجتلریمنی قاپلهیمن.»
باشقه تاماندن، دایکندی عیاللر سودا اتاقی اورین باسری لیلی صابری، قول صناعتنی عیاللرنی ایش بیلن تأمینلش و اولرنینگ اقتصادی فراوانلیگینی آشیریشده مهم رول اوینشی ممکن بولگن اقتصادی فعالیت صفتیده بهالهیدی. اونینگ ایتیشیچه: «تسمه کشتهچیلیگی صناعتینی کیچیک سرمایه بیلن باشلش ممکن و عیاللر اویدن چیقمهگن حالده هم، اوزلری اوچون درآمد تاپیشلری ممکن.»
صابری، اوشبو ساحهده فعالیت یوریتهیاتگن عیاللر اوچون مخصوص تعلیم، ایچکی و تشقی بازارلر گه چیقیش امکانیتی، کیچیک قرضلر بیریلیشی همده آنلاین مارکیتینگ بوییچه تعلیم اینگ مهم احتیاجلردن ایکنینی بیلدیرهدی.
شو بیلن بیرگه، دایکندی صناعت و سودا ریاستینینگ تدبیرکارلیک مدیری مهرعلی حقجو، سودا بازاری محدود ایکنلیگی، محصولاتلرنینگ ییترلیچه تنیتیلمسلیگی و ارزان نرخده آلیب کیلینگن توارلر بیلن رقابتنی قول صناعتی محصولاتلری ایشلب چیقرووچیلرنینگ اساسی معمالری صفتیده عنوان قیلهدی. او شوندهی دییدی: «خاماشیانینگ قیمتلیگی و قول صناعتی محصولاتلرینی تیارلشنینگ کوپ وقت طلب قیلیشی اولرنینگ نرخینی آشیرهدی. بیراق اولرنینگ صفتی یوقاریلیگی بو خرهجتنی آقلهیدی.»
حقجونینگ ایتیشیچه، صناعت و سودا ریاستی، کورگزمهلر تشکیل ایتیش و همکار تشکیلاتلر بیلن همکارلیک قیلیش آرقهلی دایکندی قول صناعتی محصولاتلرینی یخشیراق تنیتیش و اولرنینگ بازارینی کینگهیتیریش اوچون شرایط یرهتیشگه حرکت قیلماقده.
دایکندیلیک روباندوزلیک بیلن شغللنوچی عیاللر حلی هم خاماشیا ییتیشمسلیگی، یوقاری ترانسپورت خرهجتلری و محدود بازار کبی معمالر بیلن کورهشهیاتگن بولسه-ده، اولرنینگ تجربهسی شونی کورستهدی کی، مهارت، محنتسیورلیک و تکنالوژیلردن فایدهلنیش آرقهلی چیکلاولر ایچیده هم امکانیت یرهتیش ممکن.
