بادغیس ولایتیده ایریم یاش‌لر ارتودنسی (تیش‌لرنی تیکیسلش) امکانیتیدن فایده‌لنه آلمسلیک سببلی، درمان اوچون باشقه ولایت‌لر اینیقسه هرات گه باریش گه مجبور ایکنلرینی ایته‌دیلر.
۲۳ یاشلی بادغیس‌لیک سمیرا نوری‌نینگ ایتیشیچه، بیر ییلدن کوپراق وقت دوامیده تیش‌لرینی ارتودنسی قیلگن و شو دورده اوشبو خذمت‌دن فایده‌لنیش اوچون بیر نیچه بار هرات گه بارگن. او شونده‌ی دییدی: «ولایتی‌میزده امکانیت یوق ایدی و بیر نیچه بار هرات گه باریشگه مجبور بولدیم. هرات گه باریش خره‌جت‌لری هم جوده یوقاری ایدی – تخمیناً ۳۰-۴۰ مینگ افغانی. بو مبلغ‌نی تاپیش مین اوچون جوده قیین ایدی.»
بادغیس‌نینگ ینه بیر یشاوچیسی ۲۷ یاشلی مروه، تیش‌لرینی دوالش قیمت‌لیگی و ولایتده ارتودنسی بوییچه ییترلی طبی امکانیت‌لر یوق‌لیگیدن شکایت قیلیب، شونده‌ی دییدی: «تیش‌لریم قیشیق ایدی و کولگنیمده اوزیمنی ناقولی حص قیلردیم. شفاکار بیلن مصلحت‌لشگنیمدن سونگ ارتودنسی قیلیشگه قرار قیلدیم. اونینگ نرخی تخمیناً ۳۵ مینگ افغانی بولدی.»
شونینگدیک، ۱۷ یاشلی صبیه، تیش‌لرینی ارتودنسی دوالتیش جریانیده کوپلب معمالر گه دوچ کیلگنینی بیلدیره‌دی. اونگه کوره: «کولگنیمده اویه‌لردیم، شونینگ اوچون ارتودنسی قیلیشگه قرار قیلدیم. دستلب بیرآز آغریر ایدی اما حاضر عادی بولگن و اوزیمگه بولگن ایشانچیم آشگنینی حس قیله‌یپمن.»
بادغیس ولایتیدن بولگن ۲۶ یاشلی مریم احمدی ایسه تخمیناً ۱۸ آی اول تیش‌لرینی ارتودنسی دوالتگنینی ایتیب، شونده‌ی دییدی: «تیش‌لریم بیر-بیریگه توغری کیلمسدی و آوقت ییشده هم قیینچیلیککه دوچ کیلردیم. تخمیناً بیر یریم ییلدن بیری ارتودنسی قیلدیرگنمن. اونینگ نرخی قریب ۳۰ مینگ افغانی بولدی و بو مبلغ‌نی تولش مین اوچون آسان بولمه‌دی.»
ارتودنسی (تیش‌لرنی تیکیسلش) – قیشیق تیش‌لرنی توغری‌لش و جغ‌ده‌گی ناتوغری جایلشوولرنی توزه‌تیش اوچون قوللنه‌دیگن ستوماتولوژی‌نینگ مخصوص یونه‌لیشی دیر. اوشبو دوالش چَینش فعالیتینی یخشی‌لش، تبسم کورینیشینی و آغیز بوشلیغی سلامت‌لیگینی یخشی‌لشگه یاردم بیره‌دی.
ایریم تیش شفاکارلری‌نینگ ایتیشیچه، کوپچیلیک آدملر تیش‌لرینی چیرایلی کورسه‌تیش و اولر آره‌سیده‌گی بوشلیق‌لرنی یوقاتیش مقصدیده ارتودنسی دوالنیشگه مراجعت قیله‌دی.
تیش شفاکاری آمنه سادات شونده‌ی دییدی: «مراجعت قیلووچیلرنینگ اکثریتی عیاللر. بیراق بو جریان‌ده یاش جوده مهم. ۲۰ یاشگچه بولگن‌لرده نتیجه یخشی‌راق بوله‌دی. دوالش عادت‌ده آلتی آی‌دن ایکی ییلگچه دوام ایته‌دی.»
ینه بیر تیش شفاکاری یاسر امیری ایسه ارتودنسی دوالنیش اوچون مراجعت قیلووچیلرنینگ کوپچیلیگی عیاللر ایکنینی ایته‌دی. اونگه کوره: «ارتودنسی تبسم گوزه‌للیگی و حتا یوز شکلی گه هم بیواسطه تأثیر قیله‌دی. تیکیس تیش‌لر اوزیگه بولگن ایشانچ‌نی آشیره‌دی همده لب، تیش و یوز اورته‌سیده اویغونلیک یره‌ته‌دی. ارتودنسی بوییچه مراجعت قیلووچیلرنینگ تخمیناً ۶۰-۷۰ فایزی عیاللر دیر، چونکی اولر عادت‌ده تبسم و تشقی کورینیشیگه کوپراق اعتبار بیره‌دی.»
باشقه تاماندن، بادغیس ولایتی کسلخانه‌سی سوزلاوچیسی مصطفی صدیقی‌نینگ ایتیشیچه، ارتودنسی بوییچه طبی خذمت کورسه‌تیش مسئله‌سیده ولایت ساغلیق‌نی سقلش ریاستی گه مراجعت‌لر یوباریلگن. اونینگ سوزلریگه کوره: «ولایت شفاخانه‌سیده ستوماتولوژی خذمت‌لر بار، اما ارتودنسی کبی مخصوص خذمت‌لر یوق. حاضرگی خذمت‌لر اساساً تیش سوغوریش و آبسه‌نی دوالش بیلن چیکلنه‌دی.»
چیککه حدودلرده مخصوص طبی خذمت‌لردن فایده‌لنیش امکانیتی‌نینگ چیکلنگنی فقرالر سلامت‌لیگی آلدیده‌گی معمالردن بیری دیر. افغانستان اسلام امیرلیگی ساغلیق‌نی سقلش وزیرلیگی ایسه مملکت بویلب، طبی خذمت‌لرنی کینگه‌یتیریش بوییچه ایش آلیب باره‌یاتگنینی بیر نیچه بار ایتگن.
