قندوز ولایتیده حاملهدار آنهلردن قطاری تنهنینگ شیشیشی معماسیدن اذیت چیکماقده. اوشبو معما ایسه اولرنینگ کوندهلیک حیاتیگه سلبی تاثیر قوییب، مناسب طبی یاردم و آگاهیلیکنی طلب ایتهدی. شفاکارلرنینگ ایتیشلریچه، بو وضعیت اینیقسه حاملهدارلیکنینگ سونگی آیلریده آنه و چقهلاق ساغلیگی اوچون جدی عاقبتلرگه سبب بولیشی ممکن.
شوندهی بیرحالده، ساغلیقنی سقلش وزیرلیگی مسئوللری ولایتلرده حاملهدار عیاللرنینگ ساغلیق قیینچیلیکلری حلی اوچون تعلیمی و طبی خذمتلر کورسهتیلیشی بوییچه دستورلردن خبر بیرهدیلر.
تنه شیشیشی، حاملهدار عیاللر اوچون بویوک بیر قیینچیلیککه اوزگرگن؛ بو قیینچیلیک ایسه حاملهدارلیکنینگ اورته آیلریده باشلهنیب، سکیز و توقیزینچی آیلرده اینگ یوقاری درجهگه ییتهدی و بو حالت ایاقلر، قوللر و بعضا ایسه یوزنینگ جدی شکلده شیشیشی بیلن بیرگه دیر.
گرچند بو وضعیت کوپ حالتلرده یینگیل و وقتینچهلیک بولیب و اوخلش بیلن یخشیلنسهده، عیاللردن قطاریده کوندهلیک ایشلر عملگه آشیریلیشینینگ امکانسیزلنیش درجهسیگه ییتیشهدی.
تورت آیلیک حاملهدار عیاللردن مونسهنینگ ایتیشیچه، آلدینگی حاملهدارلیک دورهلریده آلتینچی آیدن ایاقلری، قوللری و یوزی شیشیشی حالتیگه روپهره بولیب و بو وضعیت سکیزینچی و توقیزینچی آیلریده کوپهیهر ایکن. او، اقتصادی قیینچیلیک سبب شفاکار گه باره آلمهی، اوشبو قیینچیلیک طفیلی اورته گه کیلهدیگن خوفلر یا-ده اونینگ دوالنیش اسلوبلری توغریسیده ییترلیچه آگاهیلیککه ایگه ایمس. «ییتی و سکیزنچی آیلرده ایاق و یوزیمده شیشیش بولهدی. جاییمدن توریش اوچون بیران کیشینینگ یاردم بیریشی کیرهک. حیات کیچیریش قیین بولهدی. اوی و تشقری ایشلریده یاردم گه احتیاج تاپهمن. هیچ بیر اسلوبدن فایدهلنگنیم یوق و بیلمهیمن نیمه قیلسم؟ بو پیتده دارو هم ییه آلمهیمن.»
حاملهدارلیکنینگ سکیز و توقیزینچی آیلریده بولگن آنهلردن زرینه و نرگس، شونینگدیک ایاقلری، قوللری و یوزلرینینگ شیشگنیدن شکایت قیلهدیلر. اوشبو وضعیت جسمانی ساغلیگینی تهدید قیلیشیگه علاوه، اولرنینگ کوندهلیک حیاتینی قیینلشتیریب و کوندهلیک ایشلرینی بجریشده باشقهلردن یاردم سورهشلریگه سبب بولگن.
زرینهنینگ ایتیشیچه: «حاملهدارلیکنینگ ییتینچی آییدن شیشیش معماسی باشلنهدی و حاضر حاملهدارلیکنینگ آخرگی آیلریده ایاقلریم جدی شکلده شیشگن و حتا جاییمدن هم توره آلمهیمن. اوی ایشلرینی بجریش اوچون باشقهلردن یاردم تیلهیمن. مذکور قیینچیلیک خوفی توغریسیده هیچ بیر نرسه بیلمهیمن. شفاکارلر توصیهلری هم هیچ قندهی سلبی تاثیری یوق ایدی.»
شونینگدیک نرگسگه کوره: «حاملهدارلیکنینگ سکیزینچی آییده مین. ایاق و قولیم جودهیم شیشگن و اوی ایشلرینی قیله آلمهیمن. یالغیز آوقت پیشیرهمن و قالگن ایشلرنی باشقهلر قیلهدی. شفاکارلرگه بارگنیمده اوخلشیمنی توصیه قیلدی. لیکن بو قیینچیلیک حاضرگچه دوام قیلیب و نیمه قیلیشیمنی بیلمهیمن.»
شوندهی بیرحالده، نسایی-ولادی شفاکارلریدن زرغونه محبتنینگ ایتیشیچه، حاملهدارلیکنینگ سونگی ایلریده حاملهدار عیالده شیماقده معماسی یوز بیرهدی. اونگه کوره، مذکور قیینچیلیک هورمون اوزگریشلری همده رگلرگه بچهداننینگ باسیم کیلتیریشی سبب اورته گه کیلهدی.
اونینگ کوپهیتیریشیچه، ایاقلر، قوللر و یوز شیشیشی، یوقاری فشار، قاریننینگ آغیریشی و درست کورمسلیک علایملری بیلن بولگنیده، آنهنینگ شفاکار گه باریشی کیرهک. «شیشیش کوپراق حاملهدارلیکنینگ سونگی آیلریده اورته گه کیلهدی و بو قیینچیلیک ایاقلر و قوللرده کوریلهدی. بو حالت هورمون اوزگریشلری و بچهدانگه باسیم کیلیشی سبب اورته گه کیلهدی و اوخلش همده ایاقلرنی یوقاری توتیش بیلن حل بولهدی. شیشیش فشار یوقاری کیتیشی، قارنی آغریشی، درست کورمسلیک یا-ده قان کیتیش کبی علایملر بیلن بوگلنیده، تیزلیککه شفاکار گه باریلیشی کیرهک. مذکور علایم جدی قیینچیلیکلر بارلیگی نی کورستهدی.»
ایچکی کسللیکلر متخصصی محمودخان زازینینگ ایتیشیچه، مناسب آوقتلنیش و درست مراقبت بولیش شیشیش کمهیشیده فایدهلی بوله آلهدی. اونینگ توصیه قیلیشیچه، حاملهدار عیاللر حددن تشقری توزدن فایدهلنمهی و اونینگ اورنیده پتاسیمدن بای آوقتلردن فایدهلنیشلری کیرهک. اونگه کوره، کوندهلیک پیاده یوریش هم قان جریانی یخشیلنیشی همده سویوقلیکلر ییغیلیشی آلدی آلینیشیده یاردم بیره آلهدی.
جناب زازینینگ کوپهیتیریشیچه: «حاملهدار عیاللر حددن تشقری توزدن فایدهلنمهسینلر، چونکه بو ایش سوو ییغیلیشی و شیشیش حالتیگه سبب بولهدی. کچالو، کیله و سبزهوات کبی آوقتلر سدیمنی دفع قیلیش و شیشیشنینگ کمهیشیده فایدهلی دیر. حاملهدار عیاللر کونده کمیده ۳۰ دقیقه پیاده یوریشلری کیرهک که سویوقلیکلر ییغیلیشی و قان جریانی کمهیشی قیینچیلیکلری آلدی آلینسین. آنهلر اوشبو علایملرنی تجربه قیلگنی صورتده، پرهاکلامپسی کبی جدی قیینچیلیک آلدی آلینیشی مقصد تیزلیککه شفاکار گه باریشلری کیرهک.»
ساغلیقنی سقلش وزیرلیگی سوزلاوچیسی شرافتزمان امرخیل، تورلیخیل قیینچیلیکلر و کسللیکلر آلدی آلینیشی اوچون اوشبو وزیرلیکنینگ سعیوحرکتلریگه اشاره قیلیب و ایتیشیچه، ولایتلرده حاملهدار آنهلرنینگ ساغلیق قیینچیلیکلری حلی توغریسیده ساغلیق و تعلیمی خذمتلرنی کورسهتیش بوییچه برنامهلرنی نظرگه آلگنلر. «قندوز ولایتیده دستلبکی و رواجلنگن سطحدهگی مرکزلر بار و حاملهدار آنهلرگه مصلحت بیرووچی و دوالنیش خذمتلر کورسهتیلهدی و شونینگدیک تخصصی تیملر هم چقهلاقلر و آنهلردن مراقبت قیلیش اوچون مذکور مرکزلرده ایش بیلن شغللنگن. ساغلیقنی سقلش وزیرلیگی شونینگدیک طبی تعلیملرنی بیریش بیلن کسللیکلر و شیشیش کبی حاملهدارلیک دورهسیدهگی قیینچیلیکلر توغریسیده عمومی آگاهیلیکلرنی آشیرماقچین.»
ایتیش کیرهک که، حاملهدارلیک دورهسیده شیشیش قندوز ولایتیدهگی آنهلر حیاتی صفتیگه تاثیر قیلووچی و جدی قیینچیلیکلردن دیر. یامان عاقبتلری توغریسیده آگاهیلیک سطحینینگ قوییلیگی و بو قیینچیلیک مدیریت بولیشی اسلوبلری، ساغلیق خذمتلریدن فایدهلنیشنینگ چیکلنگنی بیلن بیرگه اوشبو وضعیتنی قیینلشتیرگن.
بو رقم بیر وضعیتده، عمومی آگاهیلیکنی آشیریش، طبی مصلحتلر بیریلیشی کوچهیشی و حاملهدار آنهلر اوچون مراقبتی خذمتلردن فایدهلنیش امکانیتی کوپهیشی، آنهلر و چقهلاقلر ساغلیگی یخشیلنیشیده مهم رول اوینه آلهدی.
