بیرلشگن ملت‌لر تشکیلاتی نینگ انسان‌پرورلیک یاردم‌لر نی هماهنگ قیلووچی دفتری (اوچا)، ینگی‌لیکده بیر گزارش ترقه‌تیش بیلن آگاه‌لنتیرگن که، افغانستان ده‌گی ۴۰۱ تومن نینگ اوچ‌دن ایکی حصه‌سی پارتلش ماده‌لر بیلن افلاسلنگن و بو مسئله، ینگی‌لیکده منطقه‌لری گه قیتگن افغانستان‌لیک قاچقین‌لرنی اوشبو پارتلش ماده‌لر خصوصیده آگاه‌‌سیزلیک باعث، جدی خطر بیلن دوچ قیلیشی ممکن.
اوچا گزارشی نینگ بیر بولیمی‌ده کیلیشیچه: «اوچ میلیون کیشی ماین‌لر، بمب‌لر و اوروش جریانیدن پارتلمه‌ی قالگن ماده‌لر نینگ بیر کیلومتر شعاع‌سیده حیات کیچیره‌دی و هر آی باله‌لر شامل ۶۰ کیشی ماین‌لر و پارتلمه‌ی قالگن ماده‌لر پارتلشی عاقبتیده، اولیب یا-ده یره‌لنه‌دی. شونینگدیک قاچیقین‌لر هم زیان کوره‌دیلر؛ چونکه اولر باره‌دیگنلری منطقه خصوصیده معلومات‌لری یوق.»
بیزلرنینگ فیسبوک صحیفه‌میزگه باش اورینگ!
بیرلشگن ملت‌لر تشکیلاتی نینگ انسان‌پرورلیک یاردم‌لر نی هماهنگ قیلووچی دفتری اوشبو گزارشی‌ده کوپه‌یتیریشیچه، افغانستان ییرلری نینگ ماین بیلن افلاسلیگی ۲۰۰۱-ییل‌دن آلدین و کیینگی میراث دیر. اوچا گه کوره، ارزگان، قندوز، هلمند، قندهار، کنر، بادغیس، فاریاب، ننگرهار، غزنی، فراه، میدان‌وردک و سمنگان ولایت‌لری جدی شکلده ماین و اوروشلر جریانیدن پارتلمه‌ی قالگن ماده‌لر تاثیری آستیده دیر.
مملکت گه قیته‌دیگنلر اوچون پارتلمه‌ی قالگن ماده‌لر خوفی خصوصیده اوچا نینگ خواطری بیلن بیرگه، حادثه‌لر گه ییتیشیش بوییچه دولت وزیرلیگی نینگ ماین تازه‌لش هماهنگ‌لیگی و انسجام باشلیغی نورالدین رستم‌خیل نینگ ایتیشیچه، مملکت گه قیته‌دیگنلر گه معلومات بیریش اوچون، سونگی کونلر معلومات بیرووچی ۲۲ تیم افغانستان چیگره‌لریده ییرلشتیریلگن.
اونینگ کوپه‌یتیریشیچه: «۲۰۲۳-ییل نینگ باشلنگنی‌دن حاضرگچه، افغانستان ده اوروشلر جریانیدن پارتلمه‌ی قالگن ماین‌لر پارتلشی عاقبتیده ۲۵۰ واقعه‌میز بار ایدی که، ۴۴۱ کیشی اولیب و یره‌لنگن. چیگره‌لرده تیم‌لریمیز معلومات بیریش اوچون مقرر بولگن که تورخم‌ده ییتی تیم، اسپین‌بولدک‌ده بیش تیم، هرات‌ده تورت تیم و نیمروز‌ده آلتی تیم، مقرر بولگن. تیم‌لر نین کوپه‌یشی خصوصیده سعی و حرکت قیلماقده‌میز.»
اوروشلر جریانیدن پارتلمه‌ی قالگن ماده‌لر پارتلشی عاقبتیده زیان کورگن غور یشاوچیسی محمد عزیز و غزنی ده اوروشلر جریانیدن پارتلمه‌ی قالگن ماده‌لر پارتلشی عاقبتیده قربان بولگنلردن بیری نینگ یقین‌داشلریدن نوراحمد، حکومت‌دن ماین تازه‌لش بولیمی و قربانی‌لر گه یاردم بیریش خصوصیده جدی توجه قیلینیشی نی ایسته‌گنلر.
محمد عزیز نینگ ایتیشیچه: «سورو اوچون کیتگن ایدیم، توپراق آستیده ماین بارلیگی نی بیلمه‌دیم، ایاغیم نی اوستیگه قویگنیم پیتده، هوش‌دن کیتدیم. هوش گه کیلگنیم‌ده کسل‌خانه‌ده ایکنیم. ایاغینگ نی قولدن بیردینگ دیدیلر. مکتب گه هم باره‌مت، ایکی ساعت یول دیر. کوپ چرچه‌یمن.»
بیزلرنینگ «ایکس» ترماغی ده هم تعقیب قیلینگ!
شونینگدیک نوراحمد نینگ ایتیشیچه: «نیچه کیچه آلدین غزنی نینگ اندر تومنی نانی منطقه‌سیده، بیر حادثه یوز بیردی، بیر باله اولدی و نیچه کیشی یره‌لندی. یره‌لنگنلردن بیرته‌سی عیال ایدی و وضعیتی جوده‌یم یامان ایدی.»
سونگی کونلر پاکستان و ایران دن افغانستان‌لیک یشاوچیلری نینگ جبر‌دن چیقیریلیش پروسه‌سی کوپه‌یگنی و کونده مذکور ایکی مملکت‌دن افغانستان گه مینگ‌لب کیشی قیتریلگنی بیرحالده، اوچا مملکت گه قیته‌دیگن افغانستان‌لیک قاچقینلر نینگ اوروشلر جریانیدن پارتلمه‌ی قالگن ماده‌لردن زیان کوریشلری خصوصیده آگاه‌لنتیرگن.
