افغانستان و چین‌نی باغله‌یدیگن واخان ترانزیت یونه‌لیشی، جغل توشیش ایشلری یکونلنگچ، بوگون (۱۲ میزان/۴ اکتوبر، یک‌شنبه) اسلام امیرلیگی یوقاری مرتبه‌لی عملدارلری اشتراکیده فایده‌لنیشگه تاپشیریلدی.
اوزونلیگی قریب ۱۲۱ کیلومتر بولگن اوشبو یول‌نینگ قوریلیشی ایکی باسقیچ‌ده، اوچ ییل دوامیده یکونلنگن و ۳۶۵ میلیون افغانی پول صرفلنگن.
بو یول، بدخشان ولایتی بروغیل چیگره حدودی‌دن باشلنیب و واخجیر دره‌سی آرقه‌لی پامیر حدودی‌دن اوتیب چین چیگره‌سیگچه چوزیلگن. یولگه جغل یاتقیزیش بیلن بیر قطارده، تورت بویوک کوپریک، ۶۶ ته کوپریکچه و قریب اوچ مینگ ۱۰۰ متر اوزونلیکده استنادی دیوارلری هم قوریلگن.
اسلام امیرلیگی رسمی‌لری، واخان یولی افغانستان و چین اورته‌سیده‌گی سودا و ترانزیت علاقه‌لرینی کینگه‌یتیریش امکانیتینی یره‌تیشی ممکن دیگنلر.
آلدینراق، اسلام امیرلیگی قیشلاق‌لرنی رواجلنتیریش و قیته قوریش وزیرلیگی سوزلاوچیسی محمدرسول عقاب، بدخشان واخان یونه‌لیشی بوگون اسلام امیرلیگی یوقاری مرتبه‌لی عملدارلری اشتراکیده فایده‌لنیشگه تاپشیریلیشینی معلوم قیلگن ایدی.
واخان یولی، افغانستان‌نی بدخشان آرقه‌لی چین گه باغله‌یدی و اونینگ ایشگه توشیریلیشی اوشبو مملکت‌نینگ چین همده منطقه دولتلری بیلن ترانزیت و اقتصادی علاقه‌لرینی رواجلنتیریش یولیده‌گی مهم قدم صفتیده بهالنماقده.
