اسلام امیرلیگی و پاکستان اورتهسیده نسبی تینچلیک دوریدن سونگ، پاکستان حربی کوچلری ۷ سرطان/۲۸ جون، یکشنبهدن دوشنبه گه اوتر کیچه، پکتیا، پکتیکا و کنر ولایتلریگه هوا آرقهلی هجوم اویوشتیردی.
پکتیا ولایتی سمکنی تومنی «مندخیل» قیشلاغی اهالیسی، کیچه ساعت ۱۲:۰۰ اطرافیده پاکستان «قیروچی اوچاقلری» اوشبو منطقهده تینچ اهالیدن بیرینینگ تورر اویینی بمباردمان قیلگنینی ایتهدیلر.
اولر سلاموطندار بیلن صحبتده ایتیشلریچه، بیرینچی هجومدن کیین، محل یشاوچیلری یرهدارلر و توپراق آستیده قالگنلرنی قوتقریش اوچون بارگن پیتده، ایکینچی هجوم اویوشتیریلگن. بو هجوملر عاقبتیده ۱۰۰ دن آرتیق نفر شهید بولیب و جراحت آلگن.
رسول محمد، پاکستان حربی کوچلری تامانیدن بمباردمان قیلینگن اوی ایگهسی. او، پاکستان عملدارلری و ییتکرمهلرینینگ پاکستان طالبلر تحریکی «تیتیپی» اعضالریگه ضربه بیریلگن ادعالرنی رد ایتهدی.
اونینگ فکریچه، اوشبو هجوملرده تینچ اهالی تورر اویلریگه ضربه بیریلگن و اولرنینگ قربانلرینی عیاللر، بالهلر و باشقه تینچ اهالی تشکیل بیرهدی.
پکتیا ولایتی سمکنی تومنی اولسوالی اورین باسری خالد سجاد، پاکستاننینگ ینگی هجوملریده تینچ اهالیگه ضربه بیریلگنینی بیلدیرهدی. پکتیا گه قوشیمچه، پاکستان حربی کوچلری پکتیکاده گیان تومنیده هم هجوم اویوشتیرگن.
اوشبو تومن یشاوچیلریدن بولمیش وزیرخاننینگ ایتیشیچه، پاکستان حربی کوچلری «لوست» حدودی ده بیر تینچ اهالی تورر اوییگه ضربه بیرگن و اونینگ نتیجهسیده اوچ باله، ایکی عیال و بیر ایرکک شهید بولگن.
شونینگدیک، پاکستان حربی کوچلری کنر ولایتی منوره تومنی حدودلریگه قرهشلی «برولو» قیشلاغیده بیر تینچ اهالی تورر اویینی بمباردمان قیلگن. بو هجومده هیچ کیمگه ضرر ییتگن بولمسه-ده، بیراق اوی بوتونلی ویرانه گه ایلنگن و کوپینچه مالیهوی ضرر ییتکزگن.
اسلام امیرلیگی سوزلاوچیسینینگ اورین باسری حمدالله فطرت، پاکستان حربی کوچلرینینگ ینگیلیکده پکتیا، پکتیکا ولایتلریگه اویوشتیرگن هجوملریده ۳۶ تینچ اهالی جملهدن عیاللر و بالهلر شهید بولگن و ۱۶۳ نفر ایسه جراحت آلگنینی بیلدیرگن.
پاکستاننینگ ینگی هوا آرقهلی هجوملری کینگ کولملی مناسبتلر گه روپهره بولگن. امریکانینگ افغانستان ایشلری بوییچه سابق وکیلی زلمی خلیلزاد، پاکستان هجوملریده افغانستاننینگ گناهسیز یشاوچیلری اولدیریلیشینی قارهلهدی و اسلامآباد اسلام امیرلیگی راضی بولگن قرهشلر همده تکلیفلریگه جواب بیرمهگنینی ایتگن.
شو بیلن بیرگه، افغانستان سابق جمهور باشلیغی حامد کرزی، بو هجوملرنی افغانستان ملی حاکمیتینی انیق بوزیش و خلقارا قاعدهلر گه ضد حرکت دیب بهالهگن.
او ینه بیر مراتبه، پاکستان دشمنلیک سیاستی و عصیانچیلیککه نسبتن ایکی تامانلمه مناسبتدن واز کیچیب و افغانستان بیلن یخشی قوشنیچیلیک مناسبت اساسیده تعامل قیلیشیگه تأکیدلهگن.
