کابل، افغانستان پایتختی ییللر دوامیده مملکتنینگ اینگ ییریک اداری، سودا و خذمت کورسهتیش مرکزی صفتیده تنیلگن، بیراق عینی پیتده او افغانستاننینگ خرهجتلری کوندن-کونگه آغیرلشیب بارهیاتگن شهرلریدن بیریگه ایلنگن.
آزیق-آوقت محصولاتلری نرخی، اوی-جای اجارهسی، ترانسپورت خرهجتلری و باشقه خذمتلر نرخینینگ آشیشی عایلهلر گه توشهیاتگن اقتصادی باسیمنی ینهده کوچهیتیرگن.
کابل شهرینینگ پلمحمودخان حدودی یشاوچیسی بولگن نعماننینگ ایتیشیچه، پایتختده یشش خرهجتلری اولگیگه نسبتن آشگن. اونینگ سوزلریگه کوره، اوی اجارهسی و گاز نرخینینگ آشیشی، شونینگدیک سوو تأمیناتی تنقیصلیگی عایلهسیگه ینهده کتته اقتصادی باسیم کیلتیرگن. او شوندهی دییدی: «کابلده یشش خرهجتلری اولگیگه نسبتن آشیب کیتگن و یشش برچه ساحهلریده باسیملر حس بولهدی، اوی-جای اجارهسیگه سلبی تأثیر قویگن و نیچه برابر آشگن، درآمد آز و خرهجت ایسه کوپ بولگن.»
کابل شهری خیرخانه حدودی یشاوچیسی بولگن سوریا، یشش خرهجتلری یوقاریلیگدن شکایت قیلیب، اوی اجارهسی، آزیق-آوقت نرخی آشیشی، عایلهلرنی کوپینچه اقتصادی قیینچیلیک بیلن دوچ قیلگنینی بیلدیرهدی. اونینگ ایتیشیچه: «یشش خرهجتلری آشگن چونکی عایلهلرنینگ درآمدی اوزگرگن و کوپراق کمهیگن و خرهجتلر کوپراق اوی اجارهسی، آزیق-آوقت، ترانسپورت و انرژی اوچون صرفلنهدی.»
اقتصاد شناسلر، کابلده یشش خرهجتلرینینگ آشیشینی تورلی عامللر بیلن ایزاحلشماقده؛ جملهدن اهالی سانینینگ کوپهیشی، استعمال ماللری تنقیصلیگی، قوشنی دولتلردن کوپلب مهاجرلرنینگ قیتیشی و دیپورت قیلینیشی، ایش اورینلرینینگ چیکلنگنی، بازارنینگ واردات گه قرهملیگی همده اهالینینگ خرید قابلیتی پسهیگنی بو بارهده مهم رول اوینهماقده.
اقتصاد شناس امیدالله قاسمزی شوندهی دییدی: «خرهجتلر آشیشیگه ایریم عامللر سبب بولگن جملهدن اهالی سانی کوپهیشی، استعمال توارلر تنقیصلیگی و منطقهدهگی کیسکینلیکلر خرهجتلر آشیشیگه مستقیم تأثیر قویگن.»
شو بیلن بیرگه، روانشناسلر هم، اقتصادی باسیملر فقط آدملرنینگ مالیهوی وضعیتیگه تأثیر قویمهیدی، بلکی اولرنینگ روحی سلامتلیگیگه هم تأثیر قویشی حقیده آگاهلنتیرهدی.
اولرنینگ ایتیشیچه، یشش خرهجتلرینی تأمینلش اوچون تشویش قیلیش، توشکونلیک، استرس، ناامیدلیک و عایلهوی کیلیشماوچیلیکلر گه آلیب کیلهدی.
روانشناس محمدالله بلوچ، یشش احتیاجلرینی تأمینلش اوچون قیینچیلیگی بولگن عایلهلر کوپراق روحی باسیملر گه دوچ بولیشینی بیلدیرهدی. او شوندهی دییدی: «بیر شهرده اقتصاد ضعیف بولسه، عایلهلر دستلبکی یشش خرهجتلرینی تأمینلشگه اولگورمهیدی، بولر استرس، توشکونلیک و روحی سلامتلیککه آلیب کیلهدی.»
کابل، افغانستاننینگ پایتختی و اینگ کوپ اهالیگه ایگه شهری صفتیده سونگی ییللرده یشش خرهجتلرینینگ سیزیلرلی درجهده آشیشیگه دوچ کیلماقده. بو حالت فقط ایریم توارلر نرخینینگ آشیشی بیلن چیکلنمهی، بلکی عایلهلر حیاتینینگ تورلی ساحهلریگه جملهدن اوی-جای، آزیق-آوقت، سوو، انرژی و ترانسپورت خرهجتلریگه هم تأثیر کورستماقده.
