اوروش شدت‌لنگنی و طالبان جنگریلری قطار شهرلرده هجوم‌لرینی کوپه‌یتیرگن بیرحالده، اهالی تکبیر فریادی بیلن طالبان گه قرشی اَچیق و نفرت‌لرینی کورستگن. بیرینچی مرته ایکی کیچه آلدین هرات یشاوچی‌لری تکبیر فریادی و طالبان گه قرشی شعار بیلن بو حرکت نی باشله‌دی و اجتماعی ترماق‌لرده ایسه «هرات قیامی» آتی گه بیر هشتگ توزه‌لدی.
اوشبو شعارلر بیلن بیرگه امنیتی کوچلر هرات ده طالبان گه قرشی یوتوققه ایریشگن. بیراق بو کیچه کابل یشاوچی‌لری هرات یشاوچی‌لری بیلن بیر سیس بولیب و الله اکبر فریادی بیلن هرات قیامی گه ینگی جان بغیشله‌گنلر.
کیچه ساعت ۹ ده کابل یشاوچی‌لری تکبیر فریادی نی کوتاریش بیلن ینه بیر مرته، طالبان گه هر دایم امنیتی کوچلر بیلن بیر بولیب و اولردن حمایت قیلیش‌لرینی کورستگن.
شونینگدیک جمهورلیک ریاست بیرینچی اورین‌باسری امرالله صالح، کابل شهری نینگ کوچه‌لریده چیقیش بیلن اهالی گه قتنشگن.
بیزلرنینگ فیسبوک صحیفه‌میزگه باش اورینگ!
اجتماعی ترماق‌لرده جناب صالح دن نشر ایتیلگن ویدیو ده، اهالیدن قطاری جناب صالح بیلن بیرگه تکبیر فریادی، طالبان گه قرشی شعار و یشه‌سین امنیتی کوچلر دییشه‌دی.
اوتگن کیچه بونچه سیسلر آره‌سیده باله‌لرنینگ سیسی هم ایشیتیلیدی. شونینگدیک مدنی فعال و بیلیم یورت استادی حمیرا قادری، صحیفه‌سیده بیر ویدیو نشر قیلگن که بو ویدیو او و اوغلی نینگ الله اکبر دیب فریاد قیلیشی نی کورسته‌دی.
اوتگن کیچه یالغیز کابل ایمس، بلکیم باشقه ولایت‌لرده هم اهالی کوچه‌لرگه چیقیب و امنیتی کوچلردن حمایت قیلیش بیلن شعار بیرگن.
ننگرهار و خوست ولایتیدن نشر ایتیلگن فیلم‌لر، ییگیت‌لردن قطاری افغانستان بیراغی نی کوتاریش بیلن کوچه‌لرگه چیقیب و افغانستان دشمن‌لریگه قرشی شعار بیریش‌لرینی کورسته‌دی.
تخار ده سلام‌وطندار خبرچیسی نینگ ایتیشیچه، اوتگن کیچه تالقان یشاوچی‌لری هم هرات اهالیسی و هرات قیامی‌دن حمایت قیلیش بیلن تام‌لری نینگ اوستیگه چیقیب و باشقه بیر قطاری ایسه کوچه‌لرگه چیقیب، اولسین طالب، اولسین داعش، یشه‌سیین امنیتی کوچلر و بیزلر تینچلیک ایسته‌یمیز دیب شعار بیرگن.
باشقه بیر تاماندن جمهوررئیس مصلحتچیسی وحید عمر نینگ ایتیشیچه، اهالی طالبان گه قرشی توخته‌دی و الله اکبر دیدی. طالبان گه قرشی اهالی نینگ شعار بیریشی، طالبان ملت بیلن اوزی نینگ دوچ قیلگنی نی کورستدی.
بیراق طالبان سوزلاوچی‌لریدن بیری ذبیح‌الله مجاهد نینگ توییتر صحیفه‌سیده یازیشیچه، اسلامی امارت مجاهدلری اوتگن ۲۰ ییل ده الله اکبر شعاری آستیده آمریکالیکلر بیلن اوروشگن و بو شعار آمریکا غلام‌لری و سکولارلرنینگ شعاری ایمس. جناب مجاهد نینگ آگاه‌لنتیریشیچه، اولر یالغان شعارلردن قورقمه‌یدی و غلام‌لر بیلن حساب و کتاب قیله‌دی.
شونینگدیک جمهورلیک ریاست بیرینچی اورین باسری امرالله صالح نینگ فیسبوک صحیفه‌سیده یازیشیچه، طالبان بعضی‌لرنی تکبیر فریادی و الله اکبر دیگنی اوچون اوققه توتگن، چونکه اولر شو ایش اوچون توزلگن.
