جوزجان مرکزی شبرغان شهریده اونلرچه عیال طالبان گروهی‌گه قرشی بسیج بولگنلر. اولرنینگ ایتیش‌لریچه، اوز ولایت‌لریدن دفاع قیلیش اوچون سعی و حرکت قیله‌دیلر.
جوزجان‌لیک عیاللرنینگ ایتیش‌لریچه، وطن، اهالی و مملکت ملی منفعت‌لریدن دفاع قیلیش ایرکک و عیاللرنینگ مسوولیتی دیر.
طالبان‌گه قرشی قورال آلیب بسیج بولگن عیاللر قومندانی راضیه نینگ ایتیشیچه، وطندن دفاع قیلیش و اهالیدن حمایت قیلیش مقصد ده قورال آلگن‌لر.
اونینگ ایتیشیچه، حاضرگی شرایط ده جمهوریت نظامی، امنیتی کوچلر جایگاهی و اهالی نینگ عزت و شرفی خطر بیلن روپهره بولگن و انه‌شوو سبب، امنیتی کوچلر یانیده توخته‌ب طالبان‌گه قرشی اوروشه‌دیلر.
اونینگ کوپه‌یتیریشیچه، وطن یولی‌ده «شهادت» عزت دیر و حاضرگی شرایط ده افغانستان‌نی ملی بیر بسیج گه نیازی بار.
شونینگدیک، جوزجان حاکمی محمدهاشم رییس نینگ ایتیشیچه، اوشبو ولایتده کوپ‌قطار عیاللر خوفسیزلیک تامین‌لنیشی و اهالیدن دفاع قیلیش اوچون قورال آلیب طالبان‌گه قرشی بسیج بولگنلر.
جوزجان حاکمی گه کوره، اوشبو ولایت یشاوچی‌لری اوچون کیین‌گه قیتیش عیب دیر.
عین‌حالده، مدنی فعال‌لردن بیرقطاری نینگ ایتیش‌لریچه، حاضرگی شرایط ده جمهوریت و حاکمیت سقوط قیلیش خطری بیلن دوچ کیلگن و بونده‌ی وضعیتده بوتون جماعه‌نی طالبان‌گه قرشی بسیج بولیشی کیره‌ک.
بیراق، طالبان سوزلاوچیسی ذبیح‌الله مجاهد نینگ ایتیشیچه، جوزجانده دولت، عیاللر و عام اهالیدن ناتوغری فایده‌لنه‌دی.
