کابل یشاوچیسی بولمیش فریبا خلوتی، اویینینگ بیر چیکهسیده اولتیریب، هر بیریده تورت-بیشته صورت جایلشگن ورقلرنی سیکین ورق اورماقده. او راست قولی بیلن ورقلرنی آهسته-آهسته اَیلنتیرهر ایکن، کوزلریده ساغینچ عکس ایتهدی. هر بیر صحیفهسی خاطرهلرگه توله بولگن بو آلبوم اونینگ اوچون اوتگن خوش کونلرنی ایسلتهدی.
یقین اوتمیشده صورت آلیش کوپلب عایله اوچون مخصوص بیر واقعه ایدی. اوشه پیتلرده عقللی تلیفونلر و دیجیتالی کمرهلر بوگون کبی کینگ ترقهلمهگن بولیب، هر بیر صورتنی ثبت قیلیش، اوزیگه خاص هیجان و کوتیشنی آلیب کیلهردی.
عایلهلر حیاتنینگ مهم لحظهلرینی ثبت قیلیش اوچون عکاسخانهلرگه باریب و بعضا ایسه بیر نیچه ساعت یا-ده بیر کون اوچون کمره کرایه قیلهر ایدیلر. آته-آنهلر، بالهلرینی تیارلب و ینگی کییم کییدیریب، اولرنینگ بالهلیک لحظهلرینی ثبت قیلیش اوچون قوللریدن توتیب عکاسخانه تامان کیتهر ایدیلر. عکس آلیش بیلن بو موضوع یکونلنمهیدی. صورتلر آلینگنیدن کیین هم اولرنینگ چاپ بولیشی اوچون نیچه کون کوتیش باشلنهردی. نیچه کون دن سونگ، نگاتیف فیلمی نیچه قطعه صورت بیلن بیر پاکت ایچیده عایلهلر قولیگه ییتیشهردی.
صورتلر چاپ بولگنیدن کیین، بالهلر قیزیقیش بیلن عکسلرنینگ پاکتی تامان چاپیب بارهر ایدیلر. آهسته-آهسته باشقهلر هم بالهلر قیزیقیشینی کوریب و او ییرگه ییغیلهر ایدیلر، عکسلر قولمه-قول بولهر ایدی و هر بیر صورت اوتگن بیر اوتمیشنی حکایه قیلهردی؛ لیکن حاضر ایسه خاطرهلر تلیفونلرنینگ یاختی صفحهلریده جایلشگن که بیر قول اوریش بیلن کوریلیب و بیر قول اوریش بیلن اورتهدن کیته آلهدی.
هر بیر صورت، خاطرهلر صندیغی ایدی
«همه منظم توختهسین، کولینگلر… بیر، ایکی، اوچ!»
هر بیر صورتنی آلیشگه تیارگرلیک آلیش نیاز ایدی. لحظهلر بوگون قدر قولی شکلده ثبت بولمس ایدی و انه شوو قیینچیلیکلر، هر بیر صورتنینگ ارزشینی کوپهیتیرهر ایدی. عکسلر ییللرچه بلنددهگی تاقچهلر و آلبوملر ایچیده بالهلر قولیدن اوزاق بولگن جایلرگه سقلنهر ایدی.
صورتلر آلبوملری اویلرده مخصوص بیر اورینگه ایگه ایدی و اولرنینگ کوریش، اوزی عایلهلر ییغیلیشی اوچون بیر بهانه ایدی که همه بیر ییرگه ییغیلیب و هر بیر صورت بیر خاطرهنی قیته ایسلتهردی.
کابل یشاوچیسی بولمیش ۶۹ یاشر میرزا بدخش، صورت آلیش آز بولگن دورهگه اشاره قیلیب و ایتیشیچه، هر بیر عکس عایلهلر حیاتینینگ بیر بولیمینی حکایه قیلهردی. «بیزلر زمانیمیزده عکس آز ایدی، بیراق هر بیر عکسنی اوزیگه بیر قدر-قیمتی همده اَیری بیر قصهسی بار ایدی.»
خاطرهلی لحظهلرنی تصویرگه توشیریش یالغیز کمره بارلیگی بیلن چیکلنمسدی، بلکیم کوپ دقت و احتیاطکارلیکنی هم طلب قیلهردی. چونکه کمره ایچیدن نگاتیف فیلمینی چیقریش پیتیده قیلینگن اینگ کیچیک خطا، برچه صورتلرنی یوق قیلیب یوباریشی ممکن ایدی.
۴۷ یاشر فریبا خلوتی، اوشه دورهلرنی ایسلهیدی که اونده هر بیر صورتنینگ یالغیز بیرته نسخهسی بولهردی، بیراق اوشبو نسخه اینگ یقین عایله اعضالری آرهسیده قولدن قولگه اوتیب، ییل دوامیده قیمتلی یادگار صفتیده سقلهنیب قالهردی. «صورتلرنینگ اهمیتی بار ایدی و عایله همده یقینداشلر بیلن صورتلرنی کوریش جریانیده، عکسلردن بعضیلرینی طلب قیلهردیک، او صورت بیزلر اوچون جودهیم ارزشلی بولیب و یخشی شکلده سقلنهردی.»
اوشبو خاطرهلرگه کوره، اوتمیشده صورت فقط بیر تصویر ایمس، بلکیم عایلهلر خاطرهسی و قوشمه حکایهسینینگ بیر قسمی حسابلنهردی.
حاضرگچه خاطرهلرده تیریک بولگن آلبوملر
عایلهلردن قطاریده، قدیمی آلبوملر حاضرگچه هم سقلهنیب کیلماقده و اوشبو آلبوملرنینگ هر بیر صحیفهسی ورق اوریلیشی بیلن اوتمیشدن بیر بولیمنی جانلنتیرهدی.
کابل یشاوچیسی بولمیش ۲۲ یاشر صنم لطیفزاده، اویلر هریکیننینگ آزگینه یاختیسی بیلن یاریتیلگن و عایلهلر یانلریگه بیر-بیر گیلاس چای آلیب و آلبوملردهگی عکسلرنی کوریش اوچون بیر ییرگه ییغیلگنلری کیچهلرنی ایسلهیدی. «کیچیکلیگیمده، دوست و یقینداشلریمیز عکس بولگن بیر آلبومیمیز بار ایدی. برق بولمهگن و مهمان کیلگن پیتلرده، برچهمیز اولتیریب، آلبوملرنی کورهر ایدیک.»
شونینگدیک ۲۶ یاشر صفیه، تبسم بیلن اوتمیشده عایله اعضالری بیلن بیرگه ییغیلیب آلبوملرنی کوریش کیچهلرنی ایسلهب و ایتیشیچه: «مهمانلیکلرده عکس آلبوملرینی آلیب کیلهر ایدیلر و برچه کیشی بیر ییرگه ییغیلیب و صورتلرنی کوریش بیلن اوتمیشدن یاد قیلهر ایدیلر. اوشه پیتلرده آلبوملرنینگ کوپ ارزشی بار ایدی و اهالی اونی حتا بالهلر قولی ییتیشمهگن جایلرگه قویهر ایدیلر.»
بالهلیگیده عایلهلری یانیده آلبوملرنی ورق اورگن کیشیلردن قطاری اوچون بو تصویرلر حاضرگچه حیاتنینگ جانلی خاطرهلری بیر قسمی بولیب کیلماقده.
زمان بیلن بیرگه آدیم قوییش
دیجیتال دنیاسی کوچهیشی بیلن، صورتلرنینگ سقلهنیش اصولی هم تغییر قیلگن. حاضر مینگلرچه صورت تلیفونلر و کمپیوتر حافظهسیده چاپ بولیش، آلبوم یا-ده فیزیکی سقلهنیشگه نیاز بولمسدن ذخیره بولهدی. بو قولیلیک یانیده بیر قطار خواطرلر هم اورته گه کیلگن.
بلخ مرکزی مزارشریف شهری یشاوچیسی بولمیش ۲۱ یاشر ادیبالله ایشانزادهنینگ ایتیشیچه، دیجیتالی صورتلر آلینیشی کوپهیگنی بیرحالده، حاضرگچه اولرنینگ نیچه ییلگچه سقلهنیب قالیشیگه نسبت خواطرلر بار. «دیجیتالی صورتلرنینگ کوپینچه قولیلیگی بولگنی و کوپ فایدهلنیلگنی بیرحالده، امنیت و نیچه ییلگچه سقلهنیب قالیشی نقطهی نظریدن اونچهلیک ایشانچلی ایمس.»
یشاوچیلردن باشقه بیری ۳۵ یاشر طوبانینگ ایشانچیگه کوره، چاپ بولگن صورتلر دیجیتالی فایللرگه نسبت سقلهنیب قالهدیگن دیر. «دیجیتال زمانیده صورتلریمیزنی تلیفونلر یا-ده هارددسکده سقلهیمیز و بو نرسه بعضا صورتلرنینگ یوقالیب قالیشی حقیده مینی خواطرلنتیرهدی.»
گرچند دیجیتال تکنولوژیسی، صورتلر سقلهنیشینی قولیلشتیریب و اولردن فایدهلنیشنی تیزراق قیلگن، بیراق تصویرلرنینگ اوچیب کیتیشی یا-ده توسدن یوقالیب قالیش خوفی حاضرگچه فایدهلنووچیلردن قطارینی تشویشگه سالماقده.
دیجیتال دنیاسی
خواطرلر یانیده، فایدهلنووچیلردن قطارینینگ ایتیشلریچه، دیجیتال فضاسی، تیزلیکده فایدهلنه آلیش و صورتلر چاپ بولیش خرهجتینینگ کمهیشیگه سبب بولگن.
کابل یشاوچیسی بولمیش ۲۵ یاشر حلیمنینگ ایتیشیچه، دیجیتال صورتلر دایم یانیمیزده بولیب و اهالی صورت چاپ قیلیش اوچون حاضر پول خرچ قیلیشنی اونچهلیک ایستمهیدی. «صورتلر دایم تلیفونیمیزده بولهدی و ایستهگنیمیز پیتده کوره آلهمیز. اهالی حاضر صورتلرنی چاپ قیلماق اوچون پول صرفلشنی ایستمهیدی.»
شونینگدیک ۲۶ یاشر خالدهم، یشش محیط نقطهی نظریدن قاغازدن آزراق فایدهلنیشنی مهم دیب و ایتیشیچه، قاغازدن صرفلنیشی کمهیشی طبیعت و اورمانلرگه باسیم کیلیشینی بیراز کمهیتیره آلهدی.
حاضر خاطرهلر یالغیز آلبوم ورقلری آرهسیده یشهمهیدی؛ اولر تلیفونلر خاطرهسیده، یاروق صحیفهلرده و دیجیتالی فضالرده هم جای آلگن. واسطهلر اوزگرگن، بیراق انساننینگ خاطرهلرینی سقلهب قالیشگه بولگن احتیاجی حاضرگچه برقرار؛ خواه ایسکی صورت چوکاتلریده بولسین، خواه تلیفونلرنینگ ساووق و یاختی صحیفهلری.
شوندهی بیرحالده، کابل دهگی عکاسلردن پاییز جانبیننینگ ایتیشیچه، صورتلرنی هر ایکی اصولی (چاپی و دیجیتالی)، خاطرهلر سقلهنیشیگه یاردم بیره آلهدی؛ لیکن سونگی ییللرده صورت چاپ قیلیش و آلبوم تیارلشگه قیزیقیش کمهیگن.
اوشبو آلبوم ایچیده فریبا خلوتینینگ حیاتی گویا ایکی زمان آرهسیده قالگندک؛ صورتلر ایچیده حاضرگچه جانلی بولگن اوتمیش و سکوت همده کوتیشگه اوخشهب قالگن حاضرگی دور. او سونگی ورقنی سیکین یاپماقده، تصویرلرگه قیسقه نگاه تشلهیدی و آلبومنی چیتگه قویهدی؛ گویا خاطرهلرنی توگتمهی، بلکیم اولرنی فقط بیر لحظهگه آرتگه سورگندک.
