کیریش
مذکور سوراو افغانستاننینگ شهر و قیشلاق حدودلریده طبی خذمتلردن فایدهلنیش وضعیتی تیکشیریلیشی مقصد، عملگه آشیریلگن. مملکتنینگ ۳۲ ولایتیده ۱۱۳۶ یشاووچیدن قولگه کیلگن معلومات گه کوره، شهر و قیشلاق حدودلری آرهسیده طبی خذمتلردن فایدهلنیش امکانیتی، خذمتلر صفتی و دارولرنینگ موجودلیگی توغریسیده سیزیلرلی فرقلر بار. معلوماتلرگه قرهگنده، قیشلاق یشاوچیلری صفتلی طبی خذمتلردن فایدهلنیش توغریسیده کوپراق قیینچیلیکلر بیلن روپهرهلر.
اساسی تاپیلمهلر
قیشلاقلردهگی جواب بیرگنلردن ۱۰۰ فایزدن، ۳۴.۴۸ فایزی طبی خذمتلردن فایدهلنه آلدی؛ لیکن بو رقم شهرلرده ۴۲.۱۶ فایز گه ییتیشهدی.
شهر یشاوچیلریدن ۷۵ فایز یولنی اسفالتلنگن و قیر بولگن دیب گزارش بیرگن که شوندهی بیرحالده، قیشلاق یشاوچیلریدن ۲۲.۳۹ فایز بو کبی امکانیتگه ایگه دیر.
قیشلاقلردهگی شرکت قیلگنلردن ۴ فایزی طبی خذمتلرنینگ قویی صفتیدن خواطر بیلدیرگنلر.
سوراو مقصدلری
عمومی هدف: افغانستاننینگ شهر و قیشلاق حدولری آرهسیده طبی خذمتلردن فایدهلنیش وضعیتینی تیکشیرش و موجود قیینچیلیکلرنی بیلیش.
اختصاصی مقصدلر:
۱. یشاوچیلرنینگ ساغیلقنی سقلش مرکزلریدن قندهی و قنچه فایدهلنه آلیشینی تیکشیریش؛
۲. ساغلیقنی سقلش مرکزلریده کورسهتیلهدیگن خذمتلر صفتینی تیکشیریش؛
۳. دارولرنینگ موجودلیک وضعیتینی تیکشیریش؛
۴. طبی خذمتلردن فایدهلنیش توغریسیدهگی جغرافیایی و آستقورمه و چیکلاولرنی تانیش؛
۵. شهر و قیشلاق حدودلری آرهسیدهگی وضعیتنی مقایسهلش؛
تدقیقات اصوللری
تدقیقات دایرهسیدهگی کیشیلر: شهر و قیشلاق حدودلریدهگی یشاوچیلر.
نمونه حجمی: ۱۱۳۵ کیشیدن عبارت بولگن:
. شهری حدودلر: ۶۷۶ کیشی
. قیشلاقلیک حدودلر: ۴۶۰ کیشی
معلومات ییغیش واسطهلری
توزیلگن سوراونامه قوییدهگی ۱۰ سوراقدن عبارت دیر:
. طبی مرکزلرگه باریش تاریخچهسی؛
. خذمتلردن فایدهلنیش توری؛
. فایدهلنیلهدیگن خذمتلر صفتی؛
. دارولر وضعیتی؛
. جغرافیایی فاصله و کوتیب توریش مدتی؛
. باریب-کیلیش شرایطی؛
. آگاهیلیک بیریش فعالیتلری؛
تحلیل و تجزیه اصولی
. توصیفی آمار (کوپچیلیک و فایز)؛
. شهر و قیشلاق حدودلری آرهسیده مقایسهلیک شکلده تحلیل قیلیش؛
تدقیقات مدتی: ۲۰۲۵-ییل، اپریل دن اگستگچه
نشر مدتی: ۱۴۰۴-ییل اسد
طبی خذمتلر تعرفی: اهالی سلامتلیگینی سقلش، یخشیلش و توزهتیش مقصد کورسهتیلهدیگن اقداملر، آسایشتهلیکلر و مراقبتلر گه طبی خذمتلر دییلهدی. اوشبو خذمتلر آلدینی آلیش، تشخیص، دوالش، امکانیت بیریش و حمایتی مراقبتلردن عبارت بوله آلهدی و دوالنیش مرکزلر، داروخانهلر، ساغلیقنی سقلش مرکزلر، مراقبت قیلووچی تیملر و عمومی ساغلیق برنامهلر قالبتیده کورسهتیلهدی.
تدقیقات چیکلاولری
۱. جغرافیایی موقعیت و وقت چیکلاولری سبب اوزاق منطقهلردن بیر قطاریگه آزارق قول تاپیش؛
۲. مکمل تاریخی معلوماتلرگه ایگه بولمسلیک؛
۳. برچه تومنلرنی تولیق قمرهب آلیش اوچون منبعلر بوییچه چیکلاولر؛
افغانستان ده شهر و قیشلاق حدودلریده طبی خذمتلردن فایدهلنیش وضعیتینی تیکیشیریلیشینینگ کینگ قمراولی نمونهسی
گزارشنینگ خلاصه قسمی
سلاموطندار، افغانستان شهرلری و قیشلاقلریده اهالینینگ طبی خذمتلردن فایدهلنیش وضعیتینی تیکشیریش مقصد، ۳۲ ولایتده ۱۱۳۶ یشاوچی آرهسیده بیر سوراونی اوتکزگن. تورلی۱۰ ته کورستکیچ بوییچه ییغیلگن معلوماتلرگه اساسلنیب، نتیجهلر شونی کورستهدی که، شهر و قیشلاق اهالیسی آرهسیده خذمتلر کورسهتیلیشی، دارودن فایدهلنیش، فیزیکی یوللر و آگاهیلیک حمایتلرده اساسی فرقلر بار.
بو گزارشده قولگه کیلگن معلوماتلرگه کوره، طبی خذمتلردن اورتهچه فایدهلنیش درجهسی، قیشلاق یشاوچیلری آرهسیده ۳۴.۴۸ فایز و شهر یشاوچیلری آرهسیده ۴۲.۱۶ فایز دیر. بو ایسه مملکتده طبی خذمتلردن عمومی فایدهلنیش سطحینینگ قویی بولگنینی کورستهدی؛ فرقی شونده که، قیشلاق یشاوچیلری نه فقط کمراق فایدهلنیش سطحیگه ایگه دیر، بلکیم امکانیت کملیگی، جغرافیایی فاصلهلر و آستقورمهلر ضعیفلیگی سبب، خذمتلر صفتی نقطهی نظریدن هم زیان کورهدیلر. فایدهلنیش و صفت توغریسیدهگی تینگسیزلیک، قیشلاق حدودلریده ساغلیق قیینچیلیکلر کوپهیشی همده شهر بیلن قیشلاق آرهسیده سلامتلیک فرقینینگ آشیشیگه سبب بولیشی ممکن.
اوشبو سوراو نتیجهسیگه کوره، ولایتلر مرکزلریگه نسبت قیشلاقلرده طبی خذمتلردن فایدهلنیش میزانی کوپراق ضعیف دیر. قیشلاق حدودلری یشاوچیلری ساغلیقنی سقلش مرکزلریدن فایدهلنیش اوچون بعضا اولر بیر ساعتدن بیر کونگچه وقت صرفلش گه مجبور بولهدیلر. خامه، اسفالتلنمهگن و بعضا ایسه اوتیش امکانیتیگه ایگه بولمهگن یوللر، اینیقسه شاشلینچ وضعیتلرده تیز و وقتیده طبی یاردملرگه ییتیب باریش توغریسیده جدی توسیق یرهتگن.
بونگه علاوه، قیشلاق اهالیسی جدی شکلده دارو دستلبکی امکانیتلر کملیگی بیلن روپهره دیر؛ شونهی بیرحالده، شهری منطقهلرده هم کسللر خذمت قولگه کیلتیریش مقصد بیر ساعتدن کوپراق کوتیب توریشگه مجبور بولهدیلر که بو اوزی امکانیت ضعیفلیگی، طبی خذمتلر توزیمیده قیینچیلیک بارلیگی و خذمتلر کورسهتیلیشیده فایدهلی مدیریت یوقلیگینی کورستهدی. بو وضعیت طبی یاردملر صفتی و فایدهلنیشده برابرسیزلیکنی کوپهیتیرهدی و قیشلاق اهالیسینی کوپینچه خطر و یوقاری جبرلنیش خوفی آستیده قرار بیرگن.
دایمی و تیزیلمهلی آگاهیلیک بیریش برنامهلر یوقلیگی، قیشلاق و شهر آرهسیدهگی طبی خذمتلردن فایدهلنیش امکانیتیدهگی تفاوتگه تاثیر قیلووچی باشقه عامللردن بیری دیر. هر ایکی گروه یشاوچیلرینینگ ایتیشلریچه، بیر ییلدن کوپراق آگاهیلیک بیرووچی یا-ده تعلیمی کمپاین تیمی منطقهلریگه بارمهگن. اوشبو آگاهیلیک بیریش آرهسیدهگی بوشلیک اینیقسه آلدینی آلیش، دستلبکی مراقبتلر و کسللیکلر نشانهلرینی بیلیش توغریسیده، اهالینینگ طبی آگاهیلیک سطحی جدی شکلده پس درجهده سقلنماقده.
باشقه بیر تاماندن، ساغلیقنی سقلش مرکزلریده فرقلیک یوقلیگی هم فایدهلنیش تورینی کمهیتیرگن. قیشلاق حدودلریده اهالی یالغیز دولتی مرکزلرگه تیگیشی بولیب و خصوصی ساغلیقنی سقلش مرکزلر یوقلیگی سبب، مقابل و رقابتی نمونهلردن محروملر. مذکور انحصار نه فقط خذمتلر صفتینی کمهیتیرگن، بلکیم موجود مرکزلرده فعالیتنی یخشیلش ایستهگینی هم کمهیتیرگن. اونینگ برابریده، گرچند شهرلرده خصوصی مرکزلردن فایدهلنیش امکانیتی یرهتیلگن؛ بیراق مصرفی کوپ بولیب و فایدهلی نظارت یوقلیگی، شهرلرده کسللر اوچون جدی قیینچیلیکلرنی یرهتگن. توپلم شکلده فایدهلی آگاهیلیک بیریلمسلیگی و خذمت کورسهتیلیشی توریده فرقلیک یوقلیگی، هر ایکیلهسی صفت ضعیفلنیشی، رضایتلی بولیش سطحینینگ کمهیشی و اهالی اینیقسه قیشلاق حدودلریده زیان کوریشنینگ کوپهیشیگه سبب بولگن.
جدوللر اساسیده معلوماتلرنی تحلیل قیلیش
جواب بیرگنلرنینگ دموگرافیک خصوصیتلری
گزارش تفصیلاتی:
سلاموطندار افغانستان شهرلری و قیشلاقلریده طبی خذمتلردن اهالینینگ فایدهلنیش وضعیتنی تیکشیریش مقصد، ۳۲ ولایتده ۱۱۳۶ یشاوچی آرهسیده بیر سوراونی اوتکزگن. بو سوراو تورلی۱۰ ته کورستکیچ بوییچه ییغیلگن معلوماتلرگه اساسلنیب، شهر و قیشلاق حدودلری یشاوچیلری آرهسیده طبی خذمتلردن فایدهلنیش، صفت، رضایتلی بولیش و قیینچیلیکلری وضعیتینی تیکشیریب و مقایسه قیلگن. نتیجهلرگه کوره، هر ایکی گروهده ساغیلقنی سقلش مرکزلریگه مراجعت قیلیش نسبتاً فعال بولگنی بیرحالده، بو ایکی قشر آرهسیده خذمتلر صفتی، دارودن فایدهلنیش، فیزیکی یوللر و آگاهیلیک حمایتیده اساسی فرقلر بار. معلوماتلر قیشلاق حدودلریده آستقورمه یخشیلنیشی و آگاهیلیک سیستمی رواجلنیشینینگ نیاز بولگنیگه تاکید قیلهدی.
بو سوراو، افغانستاننینگ ۳۲ ولایتیده ۱۱۳۶ کیشی آرهسیده اوتکزیلگن که بو آرهده، ۶۰۴ کیشی (۵۳.۲ فایز) نی عیاللر و ۵۳۲ کیشی (۴۶.۸ فایز) نی ایرککلر تشکیل بیرهدی.
مذکور سوراوگه شرکت قیلگنلردن کوپ قطارینی ۲۵ دن ۲۵ یاش (۳۸.۸ فایز) تشکیل بیرهدی. اوندن کیین، ۲۵ دن ۳۰ یاش (۲۳.۲ فایز)، ۱۵ دن ۲۰ یاش (۱۵.۳ فایز)، ۳۰ دن ۳۵ یاش (۱۳.۹ فایز)، و شونینگدیک ۳۵ یاشدن یوقاری (۸.۸ فایز) یاش گروهلری قرار تاپیب و بو ایسه، یاشلرنینگ کوپراق طبی خذمتلردن فایدهلنه آلمسلیگینی کورستهدی.
بو گزارشده، شرکت قیلگنلر حیاتی توری هم تیکشیریلگن. شهردن شرکت قیلگنلر سانی ۶۷۶ کیشی بولیب، بو ۵۹.۵ فایزنی و قیشلاقدن شرکت قیلگنلر ۴۶۰ کیشی بولیب، ۴۰.۵ فایزنی تشکیل بیرهدی.
اشتراکچیلر ۳۲ ولایتدن بو سوراو گه شرکت قیلگن. اولردن کوپ قطاری هرات (۱۲۸ کیشی، ۱۱.۳ فایز)، بلخ (۱۱۰ کیشی، ۹.۷ فایز)، غور (۱۰۴ کیشی، ۹.۲ فایز)، تخار (۸۷ کیشی، ۷.۷ فایز) و بادغیس دن (۷۳ کیشی، ۶.۴ فایز) دیر. اینگ آز کیشی سرپل، ارزگان، پکتیکا دن بولیب، هر بیری بیر کیشی و ۰.۱ فایز بیلن، اینگ کم اشتراکچیلرگه ایگه ولایتلر حسابلنهدی.
اوشبو سوراو گه شرکت قیلگنلرنینگ جوابی اساسیده، طبی خذمتلردن فایدهلنیش اورتچه قیشلاقلیکلر آرهسیده ۳۴.۴۸ فایز و شهر یشاوچیلری آرهسیده ۴۲.۱۶ فایز دیر.
اوتگن آیده شهرلیک و قیشلاقلیک گروهلریده ساغلیقنی سقلش مرکزلریگه مراجعت قیلیش درجهسی، سیزیلرلی بولگن. شهرلیک جواب بیرگنلردن ۴۳.۰ فایزی و قیشلاقلیک جواب بیرگنلردن ۴۵.۳ فایزی، اوتگن بیر هفتهدن بیر آیگچه، ساغلیقنی سقلش مرکزلریگه بارگنلر. شونینگدیک شهر یشاوچیلریدن ۳۰.۹ فایزی و قیشلاق یشاوچیلریدن ۳۵.۴ فایزی، اوتگن ایکیدن آلتی آیگچه ساغلیقنی سقلش مرکزلریگه مراجعت قیلگن. اونینگ برابریده، مراجعت قیلیشلریدن بیری ییلدن کوپراق بولگن کیشیلر فایزی ایسه، شهرلرده ۱۷.۲ فایز و قیشلاقلرده ۸.۹ فایز گزارش بیریلگن که اونگه قرهگنده، شهرلر اهالیسی آرهسیده ساغیلقنی سقلش مرکزلریگه منظم شکلده باریش درجهسی، قیشلاقلرگه نسبت کمراق دیر.
یشش محلیده طبی خذمتلردن فایدهلنیش هم، شهر و قیشلاق حدودلری آرهسیده فرقلی دیر. شهرلرده جواب بیرگنلردن ۶۴.۹ فایزینینگ ایتیشیچه، هر ایکی (خصوصی ودولتی) طبی خذمتلردن فایدهلنه آلهدیلر؛ قیشلاقلرده ایسه بو رقم ۵۳.۲ فایز دیر. قیشلاقلرده دولتی خذمتلر ۳۱.۹ فایز بیلن، کوپراق اهمیتگه ایگه دیر؛ شهرلرده فقط ۱۱.۴ فایز اونگه مراجعت قیلهدی. اونینگ برابریده، شهرلرده خصوصی خذمتلردن فایدهلنیش (۲۳.۶ فایز) بولیب، قیشلاقلرگه نسبت (۱۴.۸ فایز) کوپراق دیر.
اینگ سونگی مراجعتده کورسهتیلگن طبی خذمتلر کیفیتی هم تیکشیریلگن. شهردهگی جواب بیرگنلردن ۲۵ فایزی و قیشلاقده جواب بیرگنلردن ۱۹.۱ فایزی، خذمتلر صفتینی یخشیراق دیگنلر. جواب بیرگنلردن کوپینچهسی، یعنی ۵۰.۳ فایز شهرلیک و ۴۳.۷ فایز قیشلاقلیک، خذمتلرنی اورته سطحیده دیگنلر. ۳۳.۷ فایز بیلن قیشلاقلرده خذمتلرنینگ ضعیف کیفیتی، ۲۰.۹ فایز بیلن شهرلردن کوپراق دییلگن. هیچ خذمت کورسهتیلمهگنینی ایتگن کیشیلر فایزی، هر ایکی گروهده ۴ فایزدن کوپراق دیر.
شونینگدیک ساغلیقنی سقلش مرکزلریده مراجعت قیلیش پیتیده دارودن فایدهلنیش میزانی، بیر قطار اختلافلرنی کورستهدی. شهرلردهگی جواب بیرگنلردن ۳۳.۹ فایزیگه کوره، دارودن ییترلی شکلده فایدهلنگنلر؛ لیکن قیشلاقلرده بو رقم یالغیز ۱۲.۶ فایز دیر. دارونینگ فایدهلنیش امکانیتی هر ایکی منطقهده هم یوقاری فایز گه ایگه دیر (شهرلرده ۴۵.۴ فایز و قیشلاقلرده ۵۱.۷ فایز). شونینگدیک قیشلاقلرده دارولرنینگ بوتونلی یوقلیگی ۱۰ فایز بیلن شهرلرگه (۳.۱ فایز) نسبت، سیزیلرلی درجهده کوپراق دیر.
ساغلیقنی سقلش مرکزلریده کوتیب توریش وقتیگه تیگیشلی، معلوماتلرگه قرهگنده، شهرلیک مراجعت قیلووچیلردن ۶۸.۵ فایزی بیردن ایکی ساعت کوتیب تورگنلر؛ قیشلاقلرده ایسه ۴۵.۴ فایز، یالغیز یریم ساعتدن بیر ساعتگچه کوتیب تورگن. اوزون مدتلی (ایکی ساعتدن بیر کونگچه) کوتیب توریش وقتی، هر ایکی منطقهده آز فایزگه ایگه دیر؛ شوندهی بیرحالده، قیشلاقلرده بیراز کوپراق گزارش بیریلگن.
ساغلیقنی سقلش مرکزلریگه باریب-کیلیش یوللری آرهسیده هم تفاوتلر بار. شهرلرده جواب بیرگنلردن کوپینچهسی (۵۴.۷ فایز)، موتر بیلن ساغلیقنی سقلش مرکزلریگه بارهدیلر؛ قیشلاقلرده ایسه اهالیدن کوپینچهسی (۴۰.۸ فایزی)، یولنی پیاده کیزهدی. قیشلاقلرده موترسایکل و بایسکلدن فایدهلنیش (۲۲.۶ فایز) بولیب شهرلرگه قرهگنده ایکی برابردن کوپراق (۱۰.۸ فایز) دیر و آز کیشی هر ایکی منطقهده مرکب (ایشک) دن فایدهلنهدی.
ساغلیقنی سقلش مرکزلریگه باریش یولی وضعیتی قیشلاقلرگه قرهگنده شهرلر کوپ یخشی دیب گزارش بیریلگن. شهر یشاوچیلریدن ۷۵ فایزینینگ ایتیشیچه، اولرنینگ باریب-کیلیش یوللری اسفالتلنگن و قیر بولگن دیر؛ قیشلاقلرده فقط ۲۲.۳۹ کیشی بو کبی یول گه ایگهلر. قیشلاقدهگی جواب بیرگنلردن ۵۸.۹ فایزی یولنی خامه و بوزوق دیگن و شونینگدیک ۱۸.۷ فایز یولنی اوتیب بولمهیدیگن و هر قندهی قولیلیک امکانیتیگه ایگه بولمهگن دیب بیلدیرگنلر.
طبی مرکزلرگچه بولگن مصافه بوییچه، شهر اهالیسیدن کوپینچهسی (۵۵ فایز)، ۱۵ دقیقهدن یریم ساعتگچه بولگن مصافهده قرار تاپگنلر؛ قیشلاقلرده ایسه بو رقم ۳۲.۱۷ فایز دیر. قیشلاقلردهگی گروهلردن کوپینچهسی (۴۴.۶ فایزی)، ساغلیقنی سقلش مرکزلریگه باریش اوچون یریم ساعتدن بیر ساعتگچه یول کیزهدیلر. شونینگدیک قیشلاق اهالیسیدن ۱۹.۱ فایزی بیر ساعتدن کوپراق یول کیزهدی؛ شهرلرده ایسه یالغیز ۷.۱ فایز بو کبی فاصلهدن گزارش بیرگنلر.
ساغلیق بوییچه معلومات بیرووچی تیملر حضوری حقیده، قیشلاقلیک جواب بیرگنلردن کوپ قطاری (۳۹.۹ فایزی)، گه کوره، آگاهیلیک بیرووچی تیمنینگ آخرین بار بارگنیدن بیر ییلدن کوپراق اوتگن؛ شوندهی بیرحالده، شهرلرده بو رقم ۳۳.۷ فایز دیر. قیشلاقلرده یالغیز ۳۰.۶ فایز، سونگی بیر آیده منطقهلریگه آگاهیلیک بیرووچی تیمنینگ بارگنینی ایتگن که بو ایسه، قیشلاق حدودلریده ساغلیق بوییچه آگاهیلیک کورسهتیلیشینینگ قسما آز فعالیتینی کورستهدی.
نهایت، شهر و قیشلاقدهگی جواب بیرگنلر آرهسیده منظم شکلده طبی معاینهلرگه اهمیت بیریش میزانینینگ مقایسه بولیشی ممکن. شهر یشاوچیلریدن ۵۱ فایزیگه کوره، ساغلیقلریگه کوپ درجهده ارزش بیرهدیلر؛ بو رقم ایسه قیشلاق اهالیسی آرهسیده ۴۳.۲ فایز دیر. معاینهلرگه هیچ اهمیت بیرمسلیک، قیشلاقلرده (۶.۳ فایز) بولیب و شهرلر ده (۱.۱ فایز) دیر که، قیشلاق حدودلریده آلدینی آلیش خذمتلریدن فایدهلنیش و آگاهیلیکنینگ کوپهیشیگه نیاز بارلیگینی کورستهدی.
اساسی نکتهلر
. صفتنی تیکشیریش: قیشلاقلیک جواب بیرووچیلرنینگ ۸۰ فایزدن آرتیغی و شهرلیک ۷۵ فایزی طبی خذمتلرنی پس یا-ده اورته درجهدن پسراق دیب بیلدیرگنلر.
. جغرافیا نقطهی نظریدن فایدهلنیش امکانیتی یوقلیگی: قیشلاق یشاوچیلریدن قریب ۷۸ فایزی ساغیلقنی سقلش مرکزلریدن فایدهلنیش اوچون، بیر ساعتدن بیر کونگچه وقتگه نیازلری بار. خامه، تیگیس یول بولمهگن و اوتیش امکانیتی بولمهگن یوللر، عاجل مراقبتلردن فایدهلنیش توغریسیدهگی جدی توسیق دیر.
. دارو کملیگی: قیشلاق اهالیسیدن ۷۸ فایزی، دارو کملیگی بیلن روپهره دیر؛ اولردن ۱۰ فایزی بوتونلی شکلده دارو فایدهلنیشدن محروم دیر.
. گوجوملیک و کوپ کوتیب توریش: شهردهگی کسللردن ۶۸ فایزی خذمتلردن فایدهلنیش اوچون بیر ساعتدن کوپراق کوتیب تورهدیلر که بو، خذمتلر کورسهتیلیش بوییچه امکانیت ضعیفلیگی و قیینچیلیگی بارلیگینی کورستهدی.
. آگاهیلیک بیریش برنامهلر یوقلیگی: قیشلاق اهالیسیدن ۴۰ فایزینینگ گزارش بیریشیچه، آگاهیلیک بیریش تیمینینگ منطقهلریگه بارمهگنیدن بیر ییلدن کوپراق بولگن.
. خذمتلرنینگ فرقلی بولمهگنی دولتی مرکزلرگه تیگیشلی بولیش: قیشلاق یشاوچلریدن ۳۱.۹ فایزی یالغیز دولتی مرکزلرگه تیگیشلی دیر و خصوصی گزینهلردن فایدهلنیشدن محروملر که بو، رقابت و صفتنی ضعیفلشتیرهدی.
. ساغلیقنی سقلشگه آز اعتبار: جواب بیرگن قیشلاق اهالیسیدن ۵۶.۸ فایزی ساغلیقلریگه ییترلیچه توجه قرهتمهیدیلر و ۶.۳ فایز آلدینی آلیش بوییچه هیچ قندهی مراقبتنی انجام بیرمهیدیلر.
مهم تکلیفلر
مکمل، شاشلینچ و میدانی معلوماتگه اساسلنگن ریجه اوچون:
. اوزاق منطقهلرده محلی ساغلیقنی سقلش مرکزلر قوریلیشی؛
. دارو ترقهتیلیش توزیلمهسینی اصلاح قیلیش؛
. دوالنیش مرکزلرگه بولگن قیشلاقلیک یوللر یخشیلنیشی؛
. آگاهیلیک بیریش برنامهلرینینگ قیته ایشگه توشیریش؛
. محلی سرمایه یاتقیزیلیش آرقهلی خصوصی خذمتلردن فایدهلنیش امکانیتی آشیریلشیی؛
نتیجه
افغانستاننینگ حاضرگی ساغلیقنی سقلش توزیمی وضعیتی، خواطرلنتیرووچی همده قیته کوریب چیقیلیش و عاجل توزیلمهوی ارهلشوونی طلب قیلهدی. بو قیینچیلیکلرنینگ حل بولیشیده کیچیکتیریلیش، انسانی و اجتماعی جدی عاقبتلرگه سبب بولیشی ممکن. آستقورمهلر یخشیلنیشی، منبعلر تامینلنیشی، آگاهیلیک آشیریلیشی و خذمتلر رواجلنیشی اوچون کینگ قمراولی یاندهشوونی قوللش، مملکتنینگ عمومی سلامتلیگینی تضمین قیلیش توغریسیده بیر نیاز حسابلنهدی.
