بلخ ده دهقانلردن قطارینینگ ایتیشلریچه، سونگی ییللرده اقلیم اوزگریشلری طفیلی سوو تنقیصلیگی و کیتمه-کیت قوروقچیلیکلر یانیده شونینگدیک مراکش چیگیرتکهلری هم ایکینچیلیک محصوللری اوچون جدید تهدیدگه اوزگرگن.
مذکور دهقانلرنینگ ایتیشلریچه، اوتگن ییللرده اوشبو آفت هجومی ایکینزارلرگه کوپینچه زیانلرنی ییتیشتیریب و شونینگدیک ایکینچیلیک محصوللریگه هم سلبی تاثیر قویگن.
اوتگن اوچ ییلده ییرلریگه زیان ییتیشگن دهقانلردن بیری نوید، مسئول نهادلردن چیگیرتکه هجومیدن آلدینگی اقداملرنینگ قولگه آلیشلرینی سورهگن. «قریب ایکی-اوچ ییلدن بیری چیگیرتکهلر بیزلرنی کوپ اذیت قیلهدی. دولتدن همکارلیک قیلیب و ییچیم یول تاپیشینی سورهیمیز یا-ده دارو سیپیلسین که بو قیینچیلیکدن قوتیلهیلیک.»
شونینگدیک بلخ دهگی دهقانلردن باشقه بیری دین محمد، ایکین موسومی باشلنگنیگه اشاره قیلیب و ایتیشیچه، ایکینزارگه قیته چیگیرتکهلر تاپیلیب و وقتیده اقدام بولمهگنی صورتده، کوپینچه زیانلرنینگ اورته گه کیلیشی ممکن. «چیگیرتکهلر بیزلرنی کوپ قیینچیلیک بیلن روپهره قیلگن. ایکینچیلیگیمیز و ایشیمیز نی جودهیم بوزگن. حاضر هم باغلریمیز و ییرلریمیز گه چیگیرتکه تاپیلگن. دولتدن توجه قیلیشنی سورهیمیز. بو وضعیتنی یقیندن کیلیب کورسینلر و دارو سیپیشنی باشلهسینلر. کمپاینلر اورته گه قوییلسین که چیگیرتکهلردن بیغم بولهیلیک.»
شوندهی بیرحالده، بلخ دهگی ایکینچیلیک ایش بیلرمانلردن قطاری، بو آفت کوچهیشیگه نسبت آگاهلنتیریب و تاکید قیلیشلریچه، توجه بولمهگنی صورتده، ایکینچیلیک محصوللریدن کوپ قسمینینگ اورتهدن کیتیش خوفی آستیده قرار تاپیشی ممکن.
بو بولیمدهگی ایش بیلرمانلردن بیری عمراننینگ ایتیشیچه، چیگیرتکهلر بیلن قرشی کورهش، فیزیکی، بیولوژیکی و لازم بولگنی صورتده، زهرلردن کنترول بولگن شکلده فایدهلنیش اصوللری ترکیبیگه نیازمند دیر. «بو آفتلر زهر بولمسدن اورتهدن کیتمهیدی. گرچند بیولوژیکی و فیزیکی یوللرنی عملگه آشیره آلهمیز و اهالی بو اصوللردن فایدهلنیشگه حرکت قیلسین و دارو گه قول اورمهسین. لیکن مجبور بولگنلری صورتده، دولت و زراعت ایشلاوچیلری تیار دیر و ییترلیچه دارو گه ایگهلر که دهقانلر یاردمی بیلن، چیگیرتکهلرنی اورتهدن کیتگزسهلر.»
باشقه بیر تاماندن، بلخ ایکینچیلیک، سووغاریش و چاروهچیلیک ریاستی مسئوللرینینگ ایتیشلریچه، بو ولایت تورلی تومنلریده چیگیرتکهلرگه قرشی کورهش دستورلری باشلنگن.
مذکور ریاست زراعتی ایشلرینی رواجلنتیریش بوییچه مدیری حسین عظیمیگه کوره: «زاری، شولگره، چمتال، کشنده، چارکنت و نهرشاهی کبی ضرر کورگن تومنلرده کمپاین یولگه قوییلگن. آفت کوچهیشیدن آلدین هم ریجهلشتیریلیش عملگه آشیریلدی و بو ییل، قریب ۲۵۰۰ هکتار ایکینچیلیک ییر، قمرهب آلینهدی.»
سونگی ییللرده مراکش چیگیرتکهلرینینگ قیته هجومی، کیتمه-کیت قوروقچیلیکلر بیلن بیرگه افغانستان شمالی ولایتلریده ایکینچیلیک بولیمینینگ جبرلنیشی حقیده خواطرلرنی کوپهیتیرگن.
