جمهوررئیس‌لیک سرایی افغانستان امنیتی کوچلریدن حمایت قیلیش گه دوام بیریش توغریسیده‌گی ناتو مدافعه وزیرلری نینگ ینگی قراری نی خوش قرشی‌لگن.
بوگون (جمعه ۱- حوت) جمهورلیک ریاست سوزلاوچیسی اورین‌باسری دواخان مینه‌پال بیر توییت آرقه‌لی یازیشیچه، افغانستان حکومتی ناتو نینگ افغانستان امنیتی کوچلریگه تعلیمات بیریش، مصلحت بیریش و جهازلنتیریش و بو تشکیلات حربی‌لری نینگ شاشیلینچ و ترتیب‌سیز شکلده افغانستان دن چیقارمه‌سی حقیده آلگنی قراری نی خوشی قرشیله‌یدی.
اونینگ ایتیشیچه، افغانستان و ناتو قوشمه بیر تهدید گه قرشی کورشه‌دی کیم بو قوشمه تهدید القاعده شامل طالبان بیلن علاقه‌سی بولگن برچه ترورچیلیک گروه‌لر دیر.
مینه‌پال نینگ کوپه‌یتیریشیچه، دوحه کیلیشوونامه‌سیدن کیین طالبان القاعده گروهی بیلن بولگن علاقه‌لرینی کیسیش‌لری کیره‌ک ایدی، بیراق اولر بو علاقه‌لرنی کیسمه‌یش گه علاوه کوچلنتیرگن.
اوتگن کون (پنج‌شنبه ۳۰- دلو) ناتو باش کاتبی ینس استولتنبرگ مذکور تشکیلات مدافعه وزیرلری نینگ ایکی کونلیک ییغینی اداغیده بیانات بیریب اورغولشیچه، مذکور تشکیلات حربی‌لری نینگ افغانستاندن چیقیشی توغریسیده حاضرگچه نهایی قرار آلینمه‌گن.
ناتو باش کاتبی نینگ کوپه‌یتیریشیچه، بو تشکیلات بیرلیشک‌لری افغانستان وضعیتی نی تیکشیرماقده و طالبان نینگ هر قنده‌ی زوروانلیگی افغانستان وضعیتی نی اوزگرتیریشی ممکن.
شونینگدیک آمریکا مدافعه وزیری لوید آستین، مذکور مملکت بیرلشیک‌لریگه افغانستان دن شاشیلینچ و ترتیب‌سیز چیقمه‌سلیکلری توغریسیده ایشانچ بیرگن.
آمریکا مدافعه وزیرلیگی بیر اعلامیه ترقه‌تیب یازیشیچه، اوتگن کون (پنج‌شنبه ۳۰- دلو) مذکور مملکت مدافعه وزیری جناب آستین ناتو مدافعه وزیرلری ییغینیده ایتیشیچه، طالبان و آمریکا دوحه کیلیشوونامه‌سیگه قنچه‌لیک عمل قیلگن‌لرینی بیللی قیلیش اوچون ایکی تامان آره‌سیده امضالنگن کیلیشوونامه تیکشیریلماقده. جناب آستین گه کوره، بو توغریده بیرلشیک‌لری و همکارلری بیلن مصلحت قیلیش اوچون متعهد دیر.
حاضر افغانستان ده کمیده ۹ مینگ و ۵۰۰ چیت‌ایللیک حربی موجود کیم اولر افغانستان امنیتی کوچلردن حمایت قیلیب و اولرگه مصلحت بیریب کیلماقده.
