حقوق شناسلر و دین عالملری، عیاللر نکاحدن آلدین اوزلرینینگ قانونی شرطلرینی نکاحخطده کیریتیش گه حقی بار و اگر ایر اوشبو شرطلر گه عمل قیلمسه، اولر قانونی یوللر آرقهلی اوز حقوقلرینی طلب قیله آلهدی دییدیلر. بیراق، ایریم عیاللر ییللر دوامیده بیرگه یشهگنیدن سونگ، نکاح قیلیش پیتیده ایر تامانیدن قبول قیلینگن اوشه شرطلر بجریلمهگنیدن شکایت قیلهدیلر.
نکاح شرطی – بو عیال یا کی ایرکک نکاح توزیش وقتیده باشقه تامانگه قویهدیگن هر قندهی مجبوریت یا کی شرط بولیب، قرشی تامان اونی قبول قیلهدی.
فقه علمالریگه کوره، مهر، نفقه و یشش جایی – هیچ قندهی شرطسیز ایر زمهسیگه واجب دیر، بیراق نکاح شرطی، نکاحنینگ اساسی رکنلری و عاقبتلریدن تشقری، ایکی تامان کیلیشووی بیلن شرطنامه گه قوشیلهدیگن مجبوریت بولیب، اگر او نکاح حجتیده قید ایتیلسه، اونی طلب قیلیش اوچون قانونی اساس حسابلنهدی.
حقوق مسئلهلری بوییچه بیلرمان فرید سکندری گه کوره، عیاللر اسلام شریعتی اساسیده اوزلرینینگ قانونی شرطلرینی نکاح حجتیگه کیریتیش حقوقیگه ایگه. اگر ایر اوشبو نکاح شرطلریگه عمل قیلمسه، عیاللر شکایت قیله آلهدیلر.
او شوندهی دییدی: «اگر ایر نکاح حجتیده کیلتیریلگن شرطلر گه عمل قیلمسه، شرعی و جمعیتیمیز قانونی تمایللریگه کوره، عیال ایریدن شکایت قیله آلهدی. البته، بو جریان باسقیچمه-باسقیچ عملگه آشیریلهدی؛ اولا اوزارا کیلیشوو اساسیده توزهتیش ییغیلیشی اوتکزیلهدی یا کی محلله آقسقاللری ارهلشهدی. اگر مسئله حل بولمسه، ایش آخر-عاقبت محکمه گه ییتکزیلیشی ممکن و عیال اوز مسئلهسینی دوام ایتتیریب، حقوقینی طلب قیلیشگه حقلی دیر.»
حقوقشناس زمان زمانی، اگر نکاح شرطلری بجریلمسه حتا عیاللر هم اوز نکاحینی بیکار قیلیشی ممکن دیب تأکید ایتهدی. او شوندهی دییدی: «اگر ایر نکاح شرطلریگه عمل قیلمسه و صداقت کورستمسه، عیال بونی طلب قیلیش حقوقیگه ایگه. حتا ایریم فقهلر فکریچه، ایر بیلگیلنگن شرطلر گه رعایه قیلمسه، عیال نکاحنی بیکار قیله آلهدی، بعضی فقهلر شو درجهگچه فکر بیلدیرگنلر.
باشقه تاماندن، دین عالملریدن بیری عبدالله گه کوره، شریعتده ایرککنینگ حقوقی صفتیده بیلگیلنگن و جایز دیب تاپیلگن نرسه گه توسقینلیک قیلیش اوچون عیاللر شرط قویه آلمهیدی. اونینگ ایتیشیچه: «اگر او شریعت و اسلام گه موافق بولسه، توغری حسابلنهدی. اگر شریعت گه ضد بولسه، بوندهی شرط حقوقی ایمس. مثلاً، عیال – سیز میندن باشقه ایکینچی یا کی اوچینچی خاتین آلمهیسیز دیگن شرط قویهدی. بو شرط شریعت گه ضد بولگنی اوچون قبول قیلینمهیدی.»
شونگه قرهمی، ایریم عیاللر سلاموطندار بیلن صحبتده ایتیشلریچه، نکاح عرفهسیده اولرنینگ قانونی (شرعی) شرطلرینی ایرلری قبول قیلگن بولسه-ده، نکاحدن کیین ایرلری بو شرطلر گه رعایه قیلمهگن.
بغلانلیک ۲۸ یاشر خوشی شوندهی دییدی: «بیرینچی کونلرده مینی شرایطیمگه حرمت قیلیندی؛ بیراق استه-سیکین شرایطیم قبول قیلینمهدی، اوز حقیمنی ایستهدیم، یامان معامله قیلیشدی؛ حتا آتهمنینگ اویی گه قیتیش گه مجبور بولدیم.»
بغلاندهگی عیاللردن باشقه بیری آمنه هم شوندهی دییدی: «نکاح پیتیده ایریمگه بیر نیچه شرط قویدیم، مهرنی تولش، اوقیشنی دوام ایتتیریش گه رخصت بیریش و تشقریده ایشلهشیمگه ایزین بیریش. مقصدیم حقوقلریم حمایه قیلینیشی و مستقل حیات کیچیریشیم ایدی. بیراق اوقیشنی دوام ایتتیریشدن باشقه شرطلریم بجریلمهدی و اوز حق-حقوقلریمنی طلب قیلگنیم اوچون دایم ایریم و اونینگ قرینداشلری بیلن گپلشیب، بحثلشیب کیلماقده من.»
بغلانلیک ۲۶ یاشلی ساجده گه کوره: «قویگن شرطلریم اوقیشنی دوام ایتتیریش و مناسب اوی گه ایگه بولیشنی اوز ایچیگه آلگن ایدی. بیراق نکاحدن کیین بو شرطلر بجریلمهدی، حتا اوقیشنی دوام ایتتیریشگه هم رخصت بیریلمهدی. مجبور بولیب سکوت سقلهدیم و عدلیه ادارهلریگه مراجعت قیله آلمهدیم، چونکی بو ییرده آوازینگنی کوترسنگ هم، بری-بیر اوزینگنی عیبلشهدی.»
بغلان یشاوچیلریدن و ایکی باله آنهسی هدیه شوندهی دییدی: «نکاحدن کیین نکاح وقتیده قوییلگن شرطلر گه عمل قیلیش اوچون هیچ قندهی حرکت قیلینمهدی و مین مجبوراً ایریم همده اونینگ عایلهسی بیلن موراسه قیلیب یشب کیلماقده من.»
حنفی فقه گه کوره، تعلیم آلیش و ایشلش حقوقی – ایرنینگ نکاحی حقوقلریگه ضرر ییتکزمسلیک شرطی بیلن نکاح شرطنامه گه شرط صفتیده کیریتیلیشی ممکن و ایر اونی بجریشگه مجبور دیر. بیراق مهرنی تولش و مناسب اوی-جای بیلن تأمینلش اصلیده علیحده شرط قیلیب قوییشنی طلب قیلمهیدی. چونکی مهر نکاحنینگ اساسی رکنلریدن بیری بولیب، باشیدن باشلب عیالنینگ مجبوری حقوقی حسابلنهدی و ایر هیچ قندهی شرطسیز اونی تولشگه مجبور دیر. شونینگدیک، مناسب و مستقل اوی-جای بیلن تأمینلش عیالنینگ اساسی حقوقلریدن بیری بولیب، اسلام شرایطی بو مسئولیتنی ایر زمهسیگه یوکلهگن. عیال بو حقوقنی طلب قیلیش اوچون اونی نکاح شرطنامهسیگه علیحده کیریتیشگه محتاج ایمس.
