نرسه ساتووچیلرنینگ چقیریقلری، سودا ساتیب آلهدیگنلرنینگ گوجوملیگی و ویترینلر قرشیسیگه قویییلگن رنگبه-رنگ کییملر، هییت بیرمی ییتیب کیلیشیدن خبر بیرهدی؛ بیراق بو آرهده، یشاوچیلردن قطاری عایلهلر آرهسیدهگی رقابتچیلیکدن خواطر بیلدیرهدیلر.
تورلی ولایتلردهگی یشاوچیلردن قطارینینگ ایتیشلریچه، هییت بیرمی کونلریده رقابتچیلیک، عایلهلردن قطارینی اقتصادی امکانیتلریدن کوپراق صرف-خرهجتگه مجبور قیلهدی. اولرنینگ ایشانچیگه کوره، هییت کییم-کیچگ، مهمانلیک و کوپینچه صرف-خرهجت توغریسیدهگی رقابت ایمس، بلکیم سادهلیک، آسایشتهلیک و خوشلیک رمزی بولیشی کیرهک.
فاریاب ولایتی یشاوچیسی بولمیش شگوفه، هییت بیرمی ییتیب کیلیشی بیلن یشاوچیلردن قطارینینگ مالی امکانیتلریدن کوپراق سودا ساتیب آلیشلرینی بیان قیلیب و ایتیشیچه، بو بیر تورلی اسراف دیر. «هییت مهر و محبت و شکر قیلیش معناسیگه دیر. هییت اوچون اوشه کیرهکلی نرسهلر ساتیب آلینیشی کیرهک.»
پروان یشاوچیسی بولمیش سمیرا، یشاوچیلر آرهسیده رقابتچیلیک تویغوسینی، اجتماعی آگاهیلیک سطحی قویی بولگنی بیلیب و ایتیشیچه، بو یاندهشوو بعضا عایلهلرنی اقتصادی قیینچیلیکلر جملهدن قرضدارلیک بیلن روپهره قیلهدی. «اهالی اوزلرینی کوپراق کورسهتیش اوچون رقابت قیلیشگه باشلهیدیلر که بو، عایلهلر آرهسیده بیر فرهنگ کبی بولگن. امید قیلهمن که بیر کونی رقابتچیلیک تعلیم، تحصیل و فایدهلی نرسهلر اوچون بولسه.»
شونینگدیک بدخشان یشاوچیسی بولمیش ستایشنینگ ایتیشیچه، بیر قطار کیشی باشقهلر فکرینی اوزیگه قرهتیش و یخشی کورینیش اوچون امکانیتلریدن کوپراق صرف-خرهجت قیلهدیلر. «بیر قطار کیشی قیمتبها کییم و نرسه بیلن اجتماعده مخصوص بیر اورینگه ایگه بولیشنی توشینهدیلر، لیکن قناعت و توان اساسیده حیات کیچیریش، کوپراق تینچلیککه سبب بولهدی.»
هرات یشاوچیسی بولمیش فاطمه لشکریگه کوره، خرهجتلرنی مدیریت قیلیش و مالی امکانیتنی نظرگه آلیش، رقابت قیلیشگه نسبت کوپراق اهمیتگه ایگه دیر. اونینگ ایتیشیچه، تینچلیک و کیینگی تشویشلردن اوزاق قالیش، هییتنی کوتیب آلیش اوچون ضرور بولمهگن نرسهلرنی ساتیب آلیشدن ارزشلی دیر.
لشکرینینگ کوپهیتیریشیچه، بعضا عیاللر آرهسیده اجتماعی رقابتلر و قیاسلماق کوپراق کوز گه کوریلیب و انه شوو موضوع عایلهلرنی اقتصادی باسیم آستیگه قویهدی. «عایلهوی رقابت قیلیش کوپراق عیاللر آرهسیده کوریلهدی و اولر اصلا مالی امکانیتلریگه توشینمهیدیلر و یالغیز اولر اوچون رقابت قیلیش مهم دیر.»
کابل یشاوچیسی بولمیش سحرگه کوره، عایلهنینگ امکانیتی بولگنی صورتده، اوی جهازلرینی ینگیلش و کوپراق سودا ساتیب آلیش ناتوغری ایمس؛ بیراق اونینگ فکریچه، اویده کیلیشماوچیلیک و قیینچیلیک یوز بیرمسلیگی اوچون برچه ایشلر عایلهنینگ اقتصادی امکانیتیگه ماس شکلده عملگه آشیریلیشی کیرهک. او، رقابت قیلیشنی عایلهوی قیینچیلیکلر و روحی باسیملر اصلی عامللریدن بیری بیلهدی. «رقابت قیلیش انسانده روحی باسیملر و عایلهلر آرهسیده قیینچیلیکلر اورته گه کیلیشیگه سبب بولهدی. پولیم بولمهگنیده رقابت قیلیش اوچون تشویش قیلیش و عایلهم گه بیران قیینچیلیک چیقریشنی ایستمهیمن.»
شونینگدیک دین عالملرینینگ ایتیشلریچه، هییت کونلری ییتیب کیلیشی بیلن بازارلرده خرید میزانی کوپهیهدی و بعضا ایسه اهالی آرهسیده ناتوغری رقابتلر کوزگه کوریلهدی.
دین عالملریدن رحیمالله کشافنینگ ایتیشیچه، یخشی مالی امکانیتگه ایگه بولگن کیشی حددن تشقری صرف-خرهجت اورنیگه، کمبغل کیشیلرگه یاردم بیریشی کیرهک. اونینگ کوپهیتیریشیچه: «تینگری تعالی شوندهی بوییرهدی: -ایینگ و ایچینگ، بیراق اسراف قیلمنگ. تینگری تعالی اسراف قیلووچیلرنی یخشی کورمهیدی.- خداوند بیر مرته امر قیلهدی که اسراف قیلمنگ دیب و باشقه بیر مرته آگاهلنتیرهدی که تینگری اسراف قیلووچیلرنی یخشی کورمهیدی دیب. اوشبو تاکید بیر مسلمان حیاتیده اسرفنینگ قطعاً جایز بولمهگنینی کورستهدی.»
هییت بیرمی ییتیب کیلیشی بیلن بیرگه، بازارلر قیته گوجوملهشیب، شهرلرده خرید قیلیش شور-شاوقینی کوپراق کوزگه کوریلهدی. شوندهی بیرحالده، بو گزارش گه کوره، هییت شور-شوقی آرهسیده اقتصادی باسیملر و اجتماعی رقابتلر توغریسیده عایلهلردن قطارینینگ آرهسیده خواطرلر بار.
یشاوچیلر و دین عالملرینینگ اورغولشیچه، هییت مالی امکانیتدن آرتیق صرف-خرهجت ایمس، بلکیم خوشلیک، همدردلیک و سادهلیک رمری بولیشی کیرهک. اولرگه کوره، قناعت قیلیب و کمبغللرگه توجه قیلیش، هییتنی حقیقی معناسی یعنی تینچلیک و مهربانلیککه یقین قیله آلیشی ممکن.
