ایران و پاکستان دن مملکت گه قیتریلگن عیاللردن قطاری، ایش فرصتلری یوقلیگیدن شکایت قیلیب و ایتیشلریچه، مملکت گه قیتگنلریدن کیین، اقتصادی قیینچیلیکلر بیلن روپهره بولیب و مناسب ایش تاپه آلمهگنلر.
مذکور عیاللرنینگ سلاموطندارگه ایتیشلریچه، مملکت گه قیتیشدن آلدین میزبان مملکتلرده مناسب ایش و درآمدگه ایگه بولیب، عایلهلرینینگ نیازلرینی تامین قیله آلهر ایکنلر؛ بیراق حاضر ایسه افغانستان ده ایشسیز یا-ده وقتینچهلیک و آز درآمدلی ایشلر بیلن حیاتلرینی کیچیرماقدهلر.
پنجشیر یشاوچیسی و پاکستان دن قیتگنیدن سکیز آی بولگن فریحهنینگ ایتیشیچه، پاکستان ده قالین توقیش آرقهلی کوپینچه درآمدگه ایگه ایکن؛ لیکن حاضر ایسه ایش زمینهسی یوقلیگی سبب، ایشسیز دیر. «پاکستان دن کیلگنیمدن سکیز آی بولهدی. پاکستان ده قالین توقهر ایدیم و یخشی درآمدیم بار ایدی. سرپرست حکومتن عیاللرگه ایش زمینهسی یرهتیلیشینی سورهیمین.»
ایران دن افغانستان گه قیتگن عیاللردن زینبنینگ ایتیشیچه، مذکور مملکتده اوچ ییل حیات کیچیریب، تیکووچیلیک آرقهلی آیده سکیز میلیون تومان درآمدگه ایگه ایکن؛ لیکن حاضر ایسه ایشسیزلیک طفیلی اقتصادی قیینچیلیکلر بیلن روپهره بولگن. «اویده تیکووچیلیک قیلهر ایدیم، آیده ییتی-سکیز میلیون تومان درآمدیم بار ایدی و حتا تورموش اورتاغیمنینگ ایشسیز بولگنیده هم اوزیم اوی صرف-خرهجتلرینی تامین قیلهر ایدیم. حاضر مملکت گه قیتگنیمیز بیلن هم اوزیم همده تورموش اورتاغیم ایشسیز دیر.»
شونینگدیک ایران دن قیتگنیدن بیر ییل بولگن عیاللردن پریسا، اوشبو مملکتده مکرومه توقیش بیلن یخشی درآمدی بارلیگینی بیان قیلیب و ایتیشیچه، افغانستان ده هم بو ایشگه دوام بیرگن، بیراق درآمدی بو مملکتده آز دیر. «ایران ده سکیز ییل حیات کیچیردیم و ایشیم ایسه مکرومه توقیش ایدی. ایران ده ساتیشیم جوده یخشی ایدی و افغانستان ده ایسه اهالی اقتصادی وضعیتی یخشی بولمهگنی سبب، ساتیشیمیز آز دیر. آنلاین شکلده ساتیش یا-ده کورگزمهلرگه شرکت قیلیشدن باشقه اونچهلیک درآمدیم یوق.»
شوندهی بیرحالده، اسلام امیرلیگی ایش و اجتماعی ایشلر وزیرلیگی مسئوللری، مملکت گه قیتگن قریب ۱۲ مینگ قاچقین گه تورلیخیل بولیملرده ایش زمینهسی یرهتیلگنینی بیان قیلگن؛ بیراق بو رقمگه عیاللرنینگ شامل بولیب، بولمسلیگی توغریسیده هیچ بیر نرسه دیمهگن.
مذکور وزیرلیک سوزلاوچیسی سمیعالله ابراهیمینینگ ایتیشیچه: «ایش و اجتماعی ایشلر وزیرلیگی، قاچقینلر اوچون ایش زمینهسینی یرهتیش بوییچه بیر کمیتهنی تشکیل بیرگن و عالی اوقووگه ایگه بولگن یا-ده مسلکنی بیلگن قاچقینلر ثبت بولیب و نیاز بولگن بستلرگه آلینهدیلر. خوشبختانه ۱۲۰۰۰ قاچقین حاضر ایش بیلن شغللنگن و مسلک بیلمهگن قاچقینلر اوچون هم ایش اورگهتیلهدیگن صنفلر یولگه قوییلگن.»
شوندهی بیرحالده، بیرلشگن ملتلر تشکیلاتینینگ عیاللر بولیمی، اوتگن کونی بیر گزارش آرقهلی، ایران و پاکستان دن قیتریلگن قاچقین عیاللردن یالغیز ۱۷ فایزینینگ درآمدی بولگنینی یازگن ایدی.
مذکور نهادنینگ کوپهیتیریشیچه، مملکت گه قیتگن عیال قاچقینلرنینگ ایش بازاری و درآمدگه قول تاپه آلمسلیگی، عایلهلر آرهسیده آزیق-آوقت خوفسیزلیگی و قرضدارلیک کوپهیشیگه سبب بولیشی ممکن.
