اوتگن ییللرده اقلیم اوزگریشلری طفیلی کیتمه-کیت قوروقچیلیکلر، غزنی دهگی دهقانلر و چاروهچیلرنینگ اقتصادی درآمدی کمهیشیگه سبب بولگن. یاغینگرچیلیکلر کمهیشی، سوو تنقیصلیگی، قوروقچیلیک و سوو تاشقینلر کبی ضررلی واقعهلر، بو طبقهگه کوپینچه اقتصادی باسیم کیلتیرگن. بو کبی بیر شرایطده، اقتصادی برقرارلیک و اقلیم اوزگریشلریگه ماسلشوو لایحهلرنی عملگه آشیریش، اهالی درآمدی و یشش طرزینی سقلش همده مستحکملش اوچون فایدهلی ییچیم بولیشی ممکن.
سونگی ییللرده، غزنی ده بیر قطار لایحهنینگ عملگه آشیریلیشی بیلن دهقانلر و چاروهچیلر آرهسیده امیدوارلیک کوپهیگن. مذکور لایحهلر ایسیقخانهلر قوریلیشی، تاووقچیلیک فارملر آچیلیشی، لبنیات ایشلب چیقریلیشی، عیاللر اوچون تیکووچیلیک ایشلری و ایش اورگهتووچی دورهلر اوتکزیلیشیدن عبارت بولیب و حاضر غزنی مرکزی همده تومنلریدن قطاریده دوام قیلماقده.
غزنی ولایتی اندر تومنیدهگی دهقانلردن غلامحضرتنینگ ایتیشیچه: «بیر باغیم بار و قوروماقده. برمه اوریشگه کوچیم ییتیشمهیدی. سوو سطحی قویی کیتگن. مذکور لایحه عملگه آشیریلگنی صورتده، اهالینینگ اقتصادی قیینچیلیگی حل بولهدی؛ اهالیدن کوپ قطاری قیینچیلیک بیلن روپهره دیر.»
شونینگدیک غزنی ولایتی خواجهعمری تومنیدهگی چاروهچیلردن حبیباللهنینگ ایتیشیچه: «حاضر کوچلی یاغینگرچیلیکده سوو تاشقینی یوز بیریشیگه سبب بولهدیگن دریالر یقینیده ییرلری بولگن جایلردن قطاریگه، دیوار قوریلگن. چیدهملیگی بولمهگن میوهلر هم تغییر بیریلگن. ایسیقخانهلر قوریلیشی و تاووقچیلیک فارملری آچیلیشی بوییچه لایحهلر هم محلدهگی اهالی اقتصادیگه یخشی تاثیری بولگن. حاضر اهالی بو خذمتلردن خوش دیر.»
باشقه بیرتاماندن، قوروقچیلیک طفیلی اقتصادی درآمدینی قولدن بیرگن نرگسنینگ ایتیشیچه، حاضر غزنی مرکزی «حیدرآباد» ساحهسیده لبنیات ایشلب چیقریش کیچیک بیر کارخانهده فعالیت قیلیب و آیده ۵۰۰۰ افغانی معاش قولگه کیلتیرهدی. «نیچه آیدن بیری اوشبو لبنیات ایشلب چیقریش کارخانهسیده ایشلهیمن؛ قتیق تولید قیلهمیز، آچار/ترشی تولید قیلهمیز. پنیر و مسکه توزتهمیز. هم اقتصادی نقطهی نظری بیزلرگه یخشی دیر همده ایشنی اورگنهمیز.»
شونینگدیک ایکینچیلیک و چاروهچیلیک ایشلری بوییچه ایش بیلرمانلرنینگ اورغولشیچه، اقلیم اوزگریشلریدن جبرلنگن دهقانلر و چاروهچیلر اوچون برقرارلیک لایحهلرنینگ عملگه آشیریلیشی ضرور بولیب و اولرنینگ برقرارلیگی تضمینلنیشی کیرهک.
ایکینچیلیک ایشلری بوییچه ایش بیلرمان و بیلیم یورت استادی حبیبالله فیضینینگ ایتیشیچه: «مینی نظریم بو که، مذکور لایحهلر غزنی شامل ولایتلردن برچهسیده ثباتی بولسین؛ یعنی برقرار قالسین. دولت آرقهلی دهقانلرنینگ حمایت بولیشی و سوداگرلرنینگ سرمایه یاتقیزیشی کیرهک. دهقانلر هم برقرارلیک لایحهلرگه قیزیقیشی کیرهک؛ چونکه بو فارملر آچیلیشی چاروهچیلیک و زراعتی سکتورنی برقرار قیلهدی و اقتصادی وضعیتنینگ یخشیراق بولیشیگه سبب بولهدی.»
شوندهی بیرحالده، غزنی ایکینچیلیک، سووغاریش و چاروهچیلیک ریاستی مطبوعات مسئولی محمدزکریا هوتکنینگ ایتیشیچه: «سونگی ییللرده، تاووقچیلیک فارملری، لبنیات ایشلب چیقریلیشی، ایش اورگهتیش دورهلری و گلخانهلر بوییچه نیچه لایحه عملگه آشیریلگن و عیاللر و ایرککلر شامل اونلب دهقان و چاروهچی، بو لایحهلرگه دخیل دیر. اوشبو لایحهلر قوروقچیلیک و اقلیم اوزگریشلریدن جبرلنگن اهالی اقتصادی رواجلنیشی اوچون جودهیم فایدهلی دیر. بو لایحهلرنینگ غزنی مرکزی و تومنلریده کوچهیشی اوچون سعیوحرکت قیلماقدهمیز.»
ایتیش کیرهک که، غزنی دهگی دهقانلر و چاروهچیلر، دایم اقلیم اوزگریشلری طفیلی اقتصادی قیینچیلیکلر بیلن روپهرهلر. یاغینگرچیلیک کمهیشی، کیتمه-کیت قوروقچیلیکلر، سوو تنقیصلیگی و طبیعی واقعهلر، اهالینینگ اقتصادی امکانیتی و آزیق-آوقت خوفسیزلیگینی تهدید قیلگن. حاضر اقتصاد برقرارلیگی بوییچه زمانهوی لایحهلر و اصوللرگه دهقانلرنینگ یوز کیلتیریشی کوپهیگن که بو دستولر دولت و همکار موسسهلر حمایتی بیلن، اقتصادی زیانلر کمهیشی و اقلیم اوزگریشلری برابریده برقرارلیک کوپهیشیگه امکانیت یرهتهدی.
