ملی مصالحه کینگشی باشلیغی عبدالله عبدالله نینگ طالبان مذاکره قیلووچی هیاتیدن تنقید قیلیب ایتیشیچه، اوشبو هیات نینگ بهانه قیلیشی سوزلشوولر ایکینچی دوری نینگ آرتده قالیشی‌گه سبب بولگن.
بوگون “جمعه” جناب عبدالله نینگ بیر اعلامیه آرقه‌لی ایتیشیچه، طالبان گروهی نینگ مذاکره قیلووچی هیاتی نامعلوم موضوع‌لرگه بهانه قیلیش بیلن سوزلشوولر ایکینچی دورینی آرتده قالدیرگن.
اونینگ کوپه‌یتیریشیچه، طالبان هیاتی اوروش‌نی کونلنتیریش و مسلمان‌لرنینگ اولدیریشی‌گه توسیق بولگنی اورنیده سفرلر و حاشیه‌یی بحث‌لر بیلن مصروف دیر.
طالبان نینگ مذاکره قیلووچی هیاتی ینگی‌لیک ده ایران و مسکوگه سفر قیلگن.
ملی مصالحه کینگشی باشلیغی نینگ ایتیشیچه، سوزلشوولر باشله‌نیشی خصوصیده طالبان هیات نینگ بهانی قیلیشی چیککه‌سیده اوشبو گروه جنگریلری افغانسان اهالیسینی اولدیریش‌گه دوام بیرماقده.
جناب عبدالله نینگ تاکید قیلیشیچه، افغانستان حکومتی نینگ مذاکره قیلووچی هیاتی کامل صلاحیت بیلن دوحه‌ده حضور تاپگن و بوتون موردلرگه بحث قیلیش‌گه تیار دیر. اونینگ کوپه‌یتیریشیچه، اوشبو هیات ملی مصالحه کینگشی، حکومت، سیاسی رهبرلر و افغانستان یشاوچی‌لری تامانیدن حمایت قیلینه‌دی.
عبدالله عبدالله نینگ ایتیشیچه، افغانستان قضیه‌سی بیرینچیدن افغانستان‌لیکلرگه تیگیشلی و اوروش‌گه نقطه قویش و ایناغه نینگ اولدیریلیشی‌نی یکونلنتیریشی اوچون بیربیراولری بیلن اوچره‌شووی کیره‌ک.
ملی مصالحه کینگشی باشلیغی نینگ آگاه‌لنتیریشیچه، سوزلشوولردن باشقه یول آرقه‌لی افغانستان قیین‌چیلیکلرینی حل قیلیش فکریده بولگنلر خطا قیله‌دی.
اوتگن هفته حکومت مذاکره قیلووچی عضالریدن بولمیش رسول طالب، غلام‌فارق مجروح و شریفه زرمتی دوحه‌ده آنلاین بیر ییغین آرقه‌لی خبرچی‌لرنینگ سوراق‌لریگه جواب قیتریب تینچلیک سوزلشوولرگه قرشی قیین‌چیلیک چیقگن ایمس، لیکن سوزلشوولرده بولگن وقفه طولانی بولگن دیگنلر.
حکومت و طالبان گروهی نینگ مذاکره قیلووچی هیات‌لری آره‌سیده بولگن سوزلشوولرنینگ ایکینچی دورینی باشلنگنیدن کمیده ۱ آی اوتماقده، لیکن اوشبو سوزلشوولر هیچ‌قنده‌ی ایجابی یوتوق قولگه کیریتمه‌گن.
