جوزجان ولایتی کینگش اعضالری نینگ ایتیشلریچه، طالبان گروهی تینچ اهالی و حربی کوچلرنی هدف آستیگه قرار بیریش مقصد ده جوزجان-بلخ قتناو یولی نینگ بیرقطار بولیملریده ماین جایلشتیرگن.
اولرنینگ ایتیشلریچه، جاری آیده اوشبو قتناو یولده مان جایلشتیریش سابقهسیز شکلده کوپهیگن.
جوزجان ولایتی کینگش اورین باسری ملا امرالدین دانشجو نینگ سلاموطندارگه ایتیشیچه، سونگی پیتلرده طالبان نینگ هدفلی ترورلری، ماین جایلشتیریش و عامهوی تاسیساتلرنی تخیریب قیلیشلری کوپهیگن.
جوزجان ولایتی کینگش اورین باسریگه کوره، طالبان جنگریلری جوزجان-بلخ قتناو یولی نینگ کته بیر بولیمیده ماین جایلشتیرگن و اوشبو یولدن اوتیب-قیتهدیگن یولاوچیلر جدی قیینچیلیک بیلن روپهره بولگنلر.
جناب دانشجو نینگ ایتیشیچه، اوشبو وضعیت نینگ دوامی جوزجان، سرپل و فاریاب یولاوچیلریگه قرشی فاجعهلی بولیشی ممکن.
عینحالده، جوزجان یشاوچیلریدن بیرقطاری نینگ ایتیشلریچه، جوزجان-بلخ قتناو یولی ۱۶ جایدن تخریب بولگن و طالبان گروهی فیضآباد تومنی نینگ حدبخش و خانقاه تومنی نینگ شاهمیرزا منطقهسیده چیکپاینت ایجاد قیلگن.
جوزجان یشاوچیلریگه کوره، حکومت بوتوغریده دقت قیلمهگن صورتده، مذکور یولنی تینچ اهالی اوچون اولیم مکانیگه اوزگریشی ممکن.
جوزجان یشاوچیلریدن بولمیش روحالله غفوری نینگ تینچ اهالی خوفسیزلیگینی تامینلشی خصوصیده حکومت نینگ دقتسیزلیگی دن تنقید قیلیب ایتیشیچه، طالبانگه قرشی دولت نینگ جیم توریشی بو وضعیت نینگ کیلیشیگه سبب بولگن.
شونینگدیک، جوزجان امنیتی مسووللری نینگ سلاموطندارگه ایتیشلریچه، طالبان جنگریلری جوزجان-بلخ قتناو یولینی تخریب قیلگنلر.
جوزجان پولیس قومندانی عبدالواحد وجدان نینگ ایتیشیچه، طالبان گروهی کته ماینلرنی جایلشتیریش بیلن اوشبو قتناو یولنی تخریب قیلگن و اهالیگه زیان ییتیشتیرگن.
جناب وجدان، طالبان نینگ برنامهلرینی مهار قیلیش اوچون جدی قرارلر آلینگنیدن ایشانچ بیرهدی.
بیراق طالبان سوزلاوچیسی ذبیحالله مجاهد نینگ ایتیشیچه، جوزجان-بلخ قتناو یولی اوشبو گروه تامانیدن قصدا تخریب قیلینمهگن.