لوگر معارف ریاست مسئوللری نینگ ایتیش‌لریچه، ناتینچلیک و فرهنگی قیینچیلیکلر باعث مذکور ولایت مرکزی پل‌علم شهری و بره‌کی‌برک، چرخ، محمدآغه و خوشی تومن‌لریده قیزلردن ۵۰ فایزی اوقیش دن محروم قالگن.
لوگر معارف ریاستی سوزلاوچیسی شاه‌پور عرب نینگ سلاموطندارگه ایتیشیچه، بو ولایتده اوقیشدن محروم قالگن قیزلرنینگ کوپینچه‌سی ابتدایی دوره دن یوقاری دیر و بو ریاست، دین عالم‌لری و قوم بویوک‌لری نینگ اَره‌لشووی بیلن اوشبو قیینچلیک نی حل ایتیش اوچون حرکت قیله‌دی.
عین حالده لوگر مرکزی و مذکور ولایت قطار تومن‌لری نینگ یشاوچی‌لریگه کوره، پل‌علم شهری و قطار تومن‌لرده ینگی تعلیمی ییل باشله‌نیشی بیلن ۴- صنف دن یوقاری بولگن قیزباله‌لرنینگ اوقیشی نی آلدی آلینگن. اولر اوروش تامان‌لریدن قیزلرنینگ اوقیشی نی آلدی آلینمه‌سلیگی نی سوره‌شگن.
لوگر حاکمی عبدالقیوم رحیمی بو ولایتده‌گی ناتینچلیکلرنی تن آلیب ایتیشیچه، امنیتی کوچلر پل‌علم شهریده جنایی جرملرنینگ آلدینی آلیش گه علاوه، تومنلر و قتناویوللرنینگ خوفسیزلیگی نی هم تأمین‌لش اوچون حرکت قیله‌دی. لوگر حاکمی مذکور ولایت دین عالم‌لری، قوم بویوک‌لری و مدنی فعاللریدن امنیت‌لری تأمین‌لنیشی اوچون امنیتی کوچلردن حمایت قیلیش‌لرینی سوره‌گن.
ایتیش کیره‌ک کیم بوندن آلدین هم لوگر نینگ ازره، خروار و چرخ تومن‌لریده مکتبلر ۴- صنف دن یوقاری بولگن قیزلرنینگ یوزیگه باغلنگن ایدی. طالبان گروهی حاضرگچه بو توغریده فکر بیلدیرمه‌گن.
