بوگون (چهارشنبه، ۱۷-عقرب)، کابل شهریده بیر برنامه یولگه قوییلیشی بیلن تعلیم و ایشدن محروم قالگن ۸۰ قیز و عیال، آلتی آیلیک مسلکی تعلیم دورینی بیتیریب و اوشبو شهردهگی بیر مؤسسهدن فارغ بولگنلر.
تعلیم و ایشدن محروم قالگن قیزلر و عیاللر اوچون یرهتیلگن اوشبو آلتی آیلیک مسلکی تعلیم دوری، لیدا شفق عظیمی تامانیدن بیش مینگ دالر خرهجت بیلن یرهتیلگن.
بیزلرنینگ «ایکس» ترماغی ده هم تعقیب قیلینگ!
«شفق» اسمی آستیده بولگن اوشبو مؤسسه باشلیغی لیدا شفق عظیمی نینگ ایتیشیچه، قیزلر نینگ تعلیم و ایشدن محروم قالگنلری طفیلی تشویشدن اوزاق قالیشلری و اولر نینگ کوچهیتیریلیشی اوچون، بیش مینگ دالر خرهجت بیلن مسلکی تعلیملر زمینهسی نی یرهتگن.
بانو عظیمی نینگ کوپهیتیریشیچه: «بو تعلیم خرهجتی شفق موسسهسی نینگ شخصی بودجهسیدن ایدی که، ۵ مینگ دالرگچه صرفلهدیک. مذکور عیاللر اوچون ایشخانهلر ایجاد قیلیش نی ایستهیمیز که بو رقم اوز ایاغلریده توختهسینلر. بو عیاللردن کوپینچهسی ییتیم و سرپرستسیز دیر. یامان بیر وضعیتده قرار تاپگنلر، انه شوو سبب اولر گه یاردم بیریش ایستهیدیک.»
شونینگدیک شفق موسسهسی باشلیغی نینگ ایتیشیچه، مسلکی تعلیملر دورهسی نی بیتیرگن قیزلر گه، مؤسسهسیده ایش فرصتلری نی یرهتیش اوچون سعی و حرکت قیلهدی.
عین حالده، اوشبو برنامهدن فارغ بولگن قیزلردن قطاری، سرپرست حکومتدن اولر گه ایش امکانیتلری و زمینهلر یرهتیلیشی نی ایستهگنلر.
مذکور تعلیمی دوردن فارغ بولگنلردن بیری آرزو حیدری نینگ ایتیشیچه: «تیکووچیلیک، توقووچیلیک، گرافیک و یقه تیکیش بولیمیلریده آلتی آی تعلیم کوردیک، ایش زمینهسی یرهتیلیشی کیرهک. ۱۲ ییل مکتب باردیک و ۲ ییل هم بیلیم یورت گه باردیک، اویده اولتیریش اورنیده، بیر هنر نی اورگنیش ایستهدیک.»
شونینگدیک مذکور تعلیمی دوردن فارغ بولگنلردن باشقه بیری رخسار فیضی نینگ ایتیشیچه: «بیزلر گه ماشین و وسیلهلر یرهتیلیشی نی ایستهیمیز. بیر نرسه نی اورگندیک، ماشینیمیز یوق که ایشلهسک. بیریلگن ایشلر نی بیتیریش اوچون آلتی آی قولده تیکیش تیکهر ایدیک. ۱۱-صنفده ایدیم که مکتبلر ایشیگی یاپیلدی. اویده تقدیرسیز بولیب قالیش اونیده سعی و حرکت قیلدیم.»
بیزلرنینگ فیسبوک صحیفهمیزگه باش اورینگ!
شفق مؤسسهسیده مسلکی تعلیم دورینی بیتیرگن قیزلر نینگ عایلهلریدن قطاری گه کوره، قیزلر یوزیگه مکتب و بیلیم یورتلر یاپیلگنی بیلن، اوشبو ایشخانه قیزلری نینگ تشویشدن اوزاق بولیشلری اوچون یخشی بیر مکان بولگن.
مسلی تعلیملر مؤسسهسیدن فارغ بولگنلردن بیری نینگ عایله اعضالریدن سوسن گه کوره: «عایلهمیزدن ایکی کیشی، بو مؤسسهدن فارغ بولدی، تورلیخیل کییملر نینگ تیکیلیشی نی اورگندیلر. مکتبلر و بیلیم یورت ایشیگی یاپیلگنی اوچون، تشویشدن اوزاق بولیش خصوصیده بیر ییرگه باریب و بیر ایش بیلن شغللندیلر.»
مذکور برنامه گه حضوری بولگن افغانستان سوداگرلیک و سرمایه یاتقیزیش اتاقلر اورینباسری خیرالدین مایل، قیزلر گه ایش زمینهسی یرهتیلیشی خصوصیده سوز بیرگن. «مملکت قانون-قاعدهسی اساسیده، ایچکی و تشقی کورگزمهلرده قول صناعتلر نینگ ساتیلیشی اوچون زمینه یرهتیلیشی خصوصیده سوز بیرهمیز.»
ایتیش کیرهک که، اوشبو تعلیمی برنامه گه شرکت قیلگنلردن قطاری، سرپرست حکومتدن عیاللر نینگ قول صناعتی ساتیلیشی اوچون عیاللر گه دایمی بازار ایجاد بولینیشینی ایستهگنلر.