د برښنا شرکت مسوولان وايي چې ازبکستان افغانستان ته د لېږدېدونکې برښنا کچه ۵۰سلنه کمه کړې ده.
د یاد شرکت ویاند حکمتالله میوندي نن پنجشنبه د لیندۍ دویمه سلاموطندار ته وویل چې ازبکستان کې د برښنا تاسیساتو د ترمیم او بیارغونې په موخه دغه هېواد یوازې د نن لپاره د وارداتي برښنا کچه ۵۰سلنه کمه کړې.
د برښنا شرکت د معلوماتو له مخې د برښنا کمېدو له امله به بلخ، سمنګان، بغلان، پروان، کاپیسا، پنجشیر، کابل، ننګرهار، لغمان، غزني، میدانوردګ، لوګر، پکتیا او خوست ولایتونو کې د برښنا پرچاوي ډېره وي.
د میوندي په وینا، د ازبکستان وارداتي برښنا به نن پنجشنبه د سهار له اتو د مازدیګر تر څلور بجو کمه وي.
هغه سلاموطندار ته وویل: «له ازبکستان د وارداتي برښنا له مزو د ساتنې او څارنې په موخه د سهار له ۸ د مازدیګر تر ۴بجو به د ازبکستان وارداتي برښنا ۵۰سلنه کمه وي.»
د یاد شرکت ویاند همداراز زیاته کړه چې د مازدیګر له څلور بجو وروسته به افغانستان ته د ازبکستان وارداتي برښنا بېرته عادي حالت ته وګرځي.
سلاموطندار پر ټویټر هم وڅارئ
افغانستان دا مهال له ازبکستان ۴۳۰ مېګاواټه برښنا رالېږدوي چې وخت ناوخت دغه هېواد کې د تخنیکي ستونزو له امله پرې کېږي چې د هېواد ګڼشمېر ولایتونه ورسره په تیاره کې وي.