د پکتیکا محلي مسوولان وايي چې دغه ولایت کې د شاوخوا اووه میلیونه افغانۍ د دوو چکډېمونو چارې بشپړې شوې دي.
د پکتيکا ولايت مقام څخه نن پنجشنبه په خپره شوې خبرپاڼه کې ويل شوي چې د خوشامند ولسوالۍ لوی زموک چکډېم او د وړممی ډمزکي چکډېم د شاوخوا ۷ ميليونه افغانيو په لګښت جوړ او ګټېاخيستنې ته سپارل شوې دي.
خبرپاڼه کې دا هم ويل شوي چې زموک چکډېم د ۵۸ متره اوږدوالی ۵,۵ متره لوړوالي او وړممۍ ولسوالۍ ډمزکئ چکډېم د ۷۵,۵ متره اوږدوالي ۵ متره لوړوالی لري.
خبرپاڼه زياتوي چې د يادو دوو چکډېمونو بودیجه د اوبو انرژۍ وزارت له لوري ورکړل شوې ده.
د یادو دوو چکډېمونو د جوړېدو چارې د یاد ولایت د ګومل فرعي سیندیزې حوزې رياست تر څارنې لاندې بشپړې او ګټېاخیستنې ته سپارل شوي دي.