د سوېلي کوریا پلازمېنې سېول کې د «سپیو فارملرونکو» د حکومت د هغې پرېکړې له امله لاریون کړی چې له مخې به یې دغه هېواد کې د «سپي غوښې» پر خوړو بندیز لګول کېږي.
رویټرز خبري اژانس نن «پنجشنبه، نومبر ۳۰مه» راپور ورکړی، دغه کسان چې شمېر یې شاوخوا ۲۰۰ ته رسېده، د ولسمشر دفتر مخې ته ورټول شوي و او د یادې جنجالي پرېکړې د لغوه کېدو غوښتنه یې کوله.
د لاریون پر مهال د پولیسو او اعتراض کوونکو ترمنځ اخډب شوی او ځینې کسان د پولیسو لهخوا نیول شوي هم دي.
د ولسمشر یونسوک یول په مشري د سوېلي کوریا واګمن ګوند څو اوونۍ وړاندې دغه هېواد کې د سپیانو غوښې خوړو او پلور بندیز په اړه یوه طرحه جوړه کړه.
د جوړې شوې طرحې له مخې هغه کسان چې د سپي غوښې کاروبار کوي اړ دي چې د درېوو کلونو په موده کې خپل کاروبار بند کړي چې دې موده کې به حکومت له دوی سره مالي مرستې هم وکړي.
د واګمن ګوند غړیو ویلي، اوس د دې وخت دی چې سوېلي کوریا کې د سپي غوښې خوړو باندې بندیز ولګول شي او په وینا یې، دې برخه کې د مخالف ګوند او خلکو ملاتړ هم شتون لري.
سوېلي کوریا کې څه باندې شپږ میلیونه کورنۍ سپیان ساتي چې د ګالوپ بنسټ د سروې له مخې، دغه هېواد کې د سپي غوښې خوړل د تېر په پرتله کم شوې دي.
که څه هم دغه هېواد کې د سپي غوښې خوړل کم شوي، خو کاروباریان او د رسټورانټونو مالکان غواړي چې د خوښې خوړو دود ژوند وساتي.
د سپیو ساتنې فارم لرونکي د سوېلي کوریا پر لومړۍ مېرمن تور پورې کوي چې پر حکومت یې فشار راوستی، څو د سپي غوښې پر خوړو بندیز ولګوي.