د اسلامي امارت د عامې روغتیا وزارت استقلال روغتون کې د سل زره امریکايي ډالرو په ارزښت د لېزري جراحۍ «لپراسکوپیک» برخه پرانیستله.
د عامې روغتیا وزارت مالي او اداري مرستیال اسحاق عاصم نن استقلال روغتون کې د لېزري جراحي برخې د پرانیستلو مراسمو ته وویل، تر دې وروسته به اړتیا نه وي چې هېوادوال د لیزري جراحۍ لپاره هېواد څخه بهر سفر وکړي.
د عامې روغتیا وزارت مالي او اداري مرستیال اسحاق عاصم له هغو ډاکټرانو څخه چې له هېواده بهر اوسیږي وغوښتل چې هېواد ته را وګرځي او هېوادوالو ته د روغتیايي خدمتونو وړاندې کولو کې ونډه واخلي.
په ورته وخت کې د کابل اوسېدونکې بنفشه چې څلور کاله یې د واده کیږي او تراوسه نه ده توانېدلې چې مور شي، استقلال روغتون ته د درملنې لپاره راغلې.
هغې وویل: «څلور کاله کېږي چې واده مې کړی او ډاکټرانو راته ویلي چې د رحم رګونه دې بند او باید عملیات شې چې تېره ورځ عملیاته شوم.»
سلاموطندار پر ټویټر هم وڅارئ
د استقلال روغتون مسوولان وايي، د لیزري جراحۍ «لپراسکوپیک» برخه کې هره ورځ تر څلورو د زیاتو ناروغانو د جراحۍ عملیات ترسره کیږي.