د «روسیې او اسلامي نړۍ» ۱۵مه اقتصادي ناسته سهشنبه، غويي ۲۵مه د تاتارستان پلازمېنه «کازان» ښار کې پیل شوه. دغه ناسته کې چې تر راتلونکې یکشنبې به دوام وکړي، د سرپرست حکومت یوه پلاوي هم پهکې ګډون کړی.
د صنعت او سوداګرۍ وزارت مسوولان وايي، د دغه وزارت سرپرست نورالدین عزیزي چې د یاد پلاوي مشري پر غاړه لري، د «روسیې او اسلامي نړۍ» د ۱۵مې اقتصادي ناستې په څنډه کې به افغانستان کې د پانګونې جلبولو لپاره د ځینو هېوادونو پلاویو او سوداګرو سره هم لیدهکاته ولري.
د سلاموطندار پښتو فېسبوکپاڼه وڅارئ
د صنعت او سوداګرۍ وزارت ویاند عبدالسلام جواد اخندزاده وویل: «د افغانستان پلاوي دې ناسته کې د ګډون ترڅنګ، د سوداګرۍ اسانتیا، د پانګونې ودې او د پانګونې جلب لپاره د روسیې او تاتارستان چارواکو او د نورو هېوادونو استازیو او شرکتونو سره لیدنې ولري.»
د هېواد اقتصادي وضعیت ته په کتو د چارو شنونکي هم ورته غونډو کې د افغانستان ګډون مهم بولي. د اقتصادي چارو شنونکي هېواد کې د پانګونې جلبولو لپاره دا شان غونډو کې د پانګونې زمینو پر وړاندې کولو ټینګار کوي.
د اقتصادي مسایلو کارپوهاه عبدالنصیر رښتیا وویل: «څومره چې د افغانستان استازي په دې ناستو کې ګډون وکړي، کولای شي هم سیاسي ستونزې حل شي او اقتصادي ستراتیژیکې اړیکو مو لاهم پیاوړې کوي.»
سره له دې چې سرپرست حکومت د نړۍ په کچه سیاسي محدودیتونو سره مخ دی، خو بیا هم هڅه کوي چې هېوادونو په ځانګړې توګه د سیمې او نړۍ اسلامي هېوادونو سره خپلې اقتصادي اړیکې لا پراخې کړي.