د هلمند په ګرمسېر ولسوالي کې د ماشومانو لپاره د ملګروملتونو ملاتړې ادارې «یونېسف» په مالي لګښت د اوبو رسونې یوې شبکې د جوړېدو چارې پیل شوې.
د اوبو رسونې دغه شبکه د ګرمسېر په کوچیانو کلي کې جوړېږي چې چارې یې، د کلیو بیارغونې او پراختیا ریاست لهخوا پرمخ وړل کېږي.
د سلاموطندار پښتو فېسبوکپاڼه وڅارئ
د دې شبکې پر جوړېدو نږدې پنځه میلیونه افغانۍ لګښت راځي چې د یونېسف له لوري ورکول کېږي.
د هلمند والي ویاند محمدقاسم ریاض په دې سلاموطندار ته وویل: «یاده شبکه د ۲۰ مترهمکعب اوبو ذخیره کولو وړتیا لري چې د ۱۲ تختو نښلولو سره، ۳۱۰۱ متره په اوږدوالي سره به د نلونو پرمټ تر هستوګنیزو کورونو پورې اوبه ورسوي او د دې ترڅنګ به ۹۲ د اوبو نلکې هم ولري.»
د ریاض په وینا، دې شبکې ته به برښنا له لمریزو دړو برابرېږي او د رغنیزو ګارونو بشپړېدو سره به سلګونو کسانو ته د کار زمینه هم برابره شي. د دې شبکې په جوړېدو سره به شاوخوا ۱۷۴ کورنیو ته د څښاک پاکې اوبه هم برابرې شي.
چارواکي ټينګار کوي چې هلمند ولایتي اداره هڅه کوي، څو تر ځمکې لاندې د اوبو کچه وساتي او د ټيټېدو مخنیوی یې وکړي.