که څه هم روسیه له سرپرست حکومت سره نږدې ډيپلوماټیکې اړیکې لري، خو د هغو هېوادونو له ډلې دی چې د وروستیو کلونو پرمهال یې له افغانستان څخه سیمې ته د ګواښونو په اړه اندېښنه ښودلې.
په دې وروستیو کې د دغه هېواد د امنیت شورا منشي سرګي شویګو قزاقستان کې د یوې غونډه پرمهال ادعا کړې، ترهګرو ډلو افغانستان کې پټنځایونه جوړ کړي او په دې توګه یې د منځنۍ اسیا د هېوادونو امنیت له ګواښ سره مخ کړی.
د سلاموطندار پښتو فېسبوکپاڼه وڅارئ
روسیې په دې وروستیو کې د دغه هېواد د ترهګرو له تورنوملړ څخه د سرپرست حکومت د نوم د ایستلو لپاره هڅې پیل کړي او د شانګهای همکاریو سازمان کې یې د افغانستان د غړیتوب ملاتړ هم کړی.
دغه چلند د روسیې د اندېښنو ترڅنګ، د افغانستان په اړه د دغه هېواد د تګلارې په اړه ځینې اندېښنې راپارولې دي.
د افغان ملت د پیوستون غورځنګ مشر محمدزلمی افغانیار پوپل وویل: «اوسنیو شرایطو کې د روسیې او افغانستان اړیکې دوه اړخیزې دي، یو د تعامل پر بنسټ خبرې دي او بل لور ته د دغه هېواد داسې څرګندونې کوي چې پهکې نارامي مطرحه کېږي.»
کارپوهان ټینګار کوي چې د روسیې لهخوا راپورته شوې اندېښنې باید په دقیقه توګه وڅېړل شي او زیاتوي چې د افغانستان په اړه د روسیې د دغه دریځ دوام د هېواد په زیان تمامېدای شي.
د سیاسي او امنیتي چارو کارپوه یوسف امین ځاځي وویل: «له یوې خوا تعامل غواړي او بل لور ته تورونه لګوي، دا د څه لپاره؟ که رښتیا هم دلته ترهګري شتون ولري او د نړۍ او سیمې امنیت ته ګواښ متوجه وي، باید امنیت شورا او هېوادونه یې په اړه پرېکړه وکړي، اسناد دې وړاندې کړي افغانانو ته.»
سره له دې چې ملګروملتونو د اسلامي امارت د یوشمېر چارواکو پر سفرونو محدودیتونه لګولي، خو روسیه دامهال د اسلامي امارت د پوهنې، لوړو زدهکړو او د کار او ټولنیزو چارو سرپرستو وزیرانو کوربه دی.