د اسراییلو پوځ وايي چې غزه کې د نښتو پر مهال یې د یوه ډګروال په ګډون لس پوځیان وژل شوي دي.
د اسراییلو پوځ نن «چهارشنبه، ډسمبر ۱۳مه» یوې خبرپاڼه کې ویلي چې دغه پوځیان پرون سهشنبه په نښتو کې وژل شوې دي.
د سلاموطندار پښتو فېسبوکپاڼه وڅارئ
الجزیرې خبري شبکې راپور ورکړی چې د لوېدیځې غاړې جنین ښار کې د اسراییلي ځواکونو پوځي عملیات دوام لري.
د راپورونو له مخې، اټکل دی چې په دې عملیاتو کې تر سلو پورې کسان د اسراییلي ځواکونو لهخوا نیول شوي دي.
فلسطین کې چارواکي وايي چې د جګړې پیل راهیسې تر دې مهاله شاوخوا ۸۰۰۰ کسان ورک شوي او یا هم تر خاورو او د ویجاړو شویو ودانیو لاندې دي.
په همدې حال کې د هوا سړښت د زرګونو هغو فلسطیني وګړو ژوند سخت کړی چې له خپلو مېنو سوېل ته بېځایه شوي او دا مهال کمپونو کې ژوند کوي.
سخت بادونه، بارانونه او له امله یې د سېلابونو راوتل د یادو بېځایه شویو ژوند سخت کړی دی.
د فلسطین روغتیا وزارت خبرداری ورکړی چې د زرګونه بېځایه شویو ترمنځ د بېلابېلو ناروغیو د خپرېدو ګواښ شتون لري.
یاد وزارت په یوې خبرپاڼه کې ویلي چې د بېځایه شویو ۱،۹ میلیونه فلسطیني وګړو له ډلې یې ۳۶۰۰۰۰ کسانو کې د عفونیت نښې نښانې موندل شوې دي.