کندوز کې امنیتي چارواکي وايي چې دغه ولایت کې د شوي ځانمرګي برید له امله پنځه کسانو خپل ژوند له لاسه ورکړی او اووه نور ټپیان دي.
د دغه ولایت د امنیه قومنداني ویاند جمعهالدین خاکسار وړاندې ویلي و، چاودنه نن سهار ۸:۳۵ بجې د کندوز ښار د مرکزي کابل بانک کوڅه کې شوې.
د سلاموطندار پښتو فېسبوکپاڼه وڅارئ
هغه سلاموطندار ته تایید کړه چې برید ځانمرګی دی او له امله یې، پنځه کسان وژل شوي او اووه ټپیان دي.
نوموړي زیاته کړې چې برید کې د بانک ساتونکي هم وژل شوي او ټپیان شوي دي.
هغه وویل: «تر اوسه د دې پیښې په تړاو څوک نه دي نیول شوي؛ خو د کندوز امنیه قومنداني استخباراتي ځواکونه، د اړوندو ادارو سره یوځای، هڅه کوي چې د دې پیښې عاملین وپیژني او عدالت ته یې وسپاري.»
کندوز کې چارواکي وايي چې د یاد ځانمرګي برید ټپیان ولایتي روغتون ته د درملنې لپاره لېږدول شوي دي.
تراوسه کوم چا یا ډلې د دغه ځانمرګي برید مسوولیت پر غاړه نهدی اخیستی.