که څه هم په سوېلي کوریا کې د «سپي» غوښه خوړل یو پخوانی دود دی، خو اوس د دغه هېواد واګمن ګوند وايي چې پر خوړو یې بندیز لګوي.
سوېلي کوریا په کور دننه او له هېواده بهر حیواناتو سره د ظلم له امله تر نیوکو لاندې دی. د واکمن ګوند مشر یواوی دونګ ویلي، د دې وخت رارسېدلی چې دغه هېواد د سپي غوښې خوړلو په اړه جنجالونو ته د پای ټکی کېښودل شي.
دونګ جمعه د نومبر ۱۷مه حکومتي چارواکو سره غونډه کې وویل: «د دې وخت دی چې د سپي غوښې مصرف په اړه ټولنیزو جنجالونو او بحثونو ته د یوه ځانګړي قانون د تصویب له لارې ورته د پای ټکی کېږدو.»
د نوموړي په وینا، روان کال به په دې اړه د یاد هېواد پارلمان ته د ممنوعیت یوه طرحه هم د تصویب لپاره ولېږل شي.
په دې غونډه کې د سوېلي کوریا د کرنې وزیر چونګ هوانګکیون ټينګار وکړ چې حکومت به دغه بندیز په چټکۍ پلی کړي او په وینا یې، د سپي غوښې هغو کاروباریانو څخه به هم ملاتړ وکړي چې د بندیز له کبله اغېزمن کېږي.
د حیواناتو د حقونو ډلو د سوېلي کوریا له دې پرېکړې هرکلی کړی او د ژر تر ژره پليکېدو غوښتنه یې کړې ده.
سلاموطندار پر ټویټر هم وڅارئ
د سوېلي کوریا د حکومت د معلوماتو له مخې، دغه هېواد کې د سپیو د روزنې او پالنې ۱۱۵۰ فارمونه، ۳۴ مصلخونه، د غوښې وېش ۲۱۹ شرکتونه او شاوخوا ۱۶۰۰ رسټورانټونه شتون لري.