د اوکراین د بېړنیو خدمتونو ادارې اعلان کړی چې د روسیې د یوې بېپیلوټه الوتکې په برید کې چې د دنیپرو ښار په شاوخوا کې د کانکېندونکو کارګرو پر یوه بس موټر شوی، لږترلږه ۱۵ کسان وژل شوي او اووه نور ټپیان دي.
برید هغه مهال شوی چې څو ساعته وړاندې د روسیې او اوکراین ترمنځ د سولې د راتلونکې دورې د خبرو مهالویش اعلان شوی و.
د اوکراین ولسمشر ولودېمېر زېلېنسکي دغه برید «یو ویرونکی جنایت» بللی او ویلي یې دي چې د روسیې دوامدار بریدونه د تاوتریخوالي د زیاتېدو مسوولیت پر مسکو وراچوي.
سلاموطندار پر اېکسپاڼه هم وڅارئ
د سلاموطندار پښتو فېسبوکپاڼه وڅارئ
د اوکراین تر ټولو ستر خصوصي انرژۍ شرکت «ډيټياېکې» ویلي، یاد بس د همدې شرکت و او روسیه یې د دنیپروپتروفسک په کانونو کې پر پراخو او «ترهګریزو بریدونو» تورنه کړې ده.
زېلېنسکي تر برید څو ساعته مخکې ویلي و چې د سولې خبرې به د چهارشنبې او پنجشنبې په ورځو شي.
په همدې حال کې، د روسیې دولتي خبري اژانس «تاس» راپور ورکړی چې روسي ځواکونو د خارکیف او دونتسک په ځینو سیمو کې کنټرول ترلاسه کړی او د اوکراین د پوځ د ترانسپورتي زیربناوو هدف ګرځولي دي.