د روسيې دفاع وزارت مسوولان وایي چې په دونيڅک کې يې له اوکرايني ځواکونو دوه کلي نيولي دي.
د روسیې دفاع وزارت په وينا، په ختیځ دونیڅک سیمه کې د سریبرینکا او مایکولایوکا کلي د دوی تر ولکې لاندې راغلي دي.
د سلاموطندار پښتو فېسبوکپاڼه وڅارئ
د اوکرایین پوځ د دواړو کلیو د سقوط خبره نه تاييدوي، خو وايي، د لومړۍ کرښې دواړه سیمې د سختې جګړې له امله کلابندې دي.
د اوکراین پوځ ادعا کوي چې د دوی ځواکونو د سربیانکا په شاوخوا کې د روسیې ۱۲ بریدونه شنډ کړي دي. اوکراین همداراز وايي، د پوکروفسک ښار ته څېرمه چې د روسي ځواکونو لپاره مهم ښار دی، سخته جګړه روانه ده.
بلخوا امريکا وايي چې د روسيې نږدې ملګري شماليکوریا دغه هېواد ته خپل ۳۰۰۰ سرتېري لېږلي دي.
د ياد هېواد دفاع وزير لوېډ استن ويلي، که دغه سرتېري د روسيې په ملاتړ د اوکراین پر ضد جګړې کې برخه واخلي، شمالي کوریا ته به ګرانه تمامه شي.
بلخوا د امریکا د سپینې ماڼۍ د ملي امنیت شورا ویاند جان کربي هم خبريالانو ته ويلي، که دغه سرتېري جګړه کې برخه اخلي، په نښه به شي.
د نوموړي په وینا، اوکراین به د يادو سرتېرو پر وړاندې هغسې له ځانه دفاع وکړي، لکه څنګه يې چې د روسي ځواکونو پر وړاندې کوي.