د میدانوردګ د دایمیرداد ولسوالي اوسېدونکي وایي چې د دغه ولایت یوشمېر اوسېدونکو په خپل شخصي لګښت د «ارګ کوتل» د بیارغونې چارې پيل کړې دي.
د یاد ولایت د دایمیرداد ولسوالي یوه اوسېدونکي رسولګل سلاموطندار ته وویل، دغه سړک د دایمیرداد ولسوالي اړوند دی چې دوه کیلومټره اوږدوالی لري او په دې وروستیو کې ویجاړ شوی و.
هغه زیاته کړه چې د یاد سړک خرابوالي له امله پر یاده لاره تلونکي مسافر او موټرچلوونکي په ستونزو کې وو چې خلکو یې د جوړېدو هڅې پیل کړې دي.
د نوموړي په وینا، د دایمیرداد ولسوالي اوسېدونکو په خپل شخصي لګښت د یاد سړک د بیارغونې چارې پيل کړي او له جوړېدو سره به یې د ژمي پر مهال د د یادې ولسوالي د ارګ کوتل سړک ستونزې حل شي.
نوموړي د میدانوردګ پر ولایتي ادارې غږ وکړ چې د دایمیرداد په ګډون د دغه ولایت په بېلابېلو ولسوالیو کې د جګړو او سېلابونو له امله ویجاړ شوي سړکونه بیاورغوي.
باید وویل شي چې تېره میاشت هم د میدانوردګ مرکزي بهسودو ولسوالي کې یوه کس په خپل شخصي لګښت د نجونو او هلکانو یوه منځني ښوونځي ته ودانۍ جوړه کړه.
سلاموطندار پر ټویټر هم وڅارئ
له میدانوردګ سربېره د هېواد په نورو ولایتونو کې هم عامو خلکو په خپل شخصي لګښت او هلو ځلو سړکونه، ښوونځيو ته ودانۍ او دې ته ورته رغنیز کارونه کړې دي.