د احصایې او معلوماتو ملي اداره وايي چې د تېر ۱۴۰۲کال پرمهال په هرات کې خلکو ته څه باندې ۴۵۴زره پېژندپاڼې وېشل شوې دي.
یادې ادارې نن سهشنبه د غويي څلورمه پر خپله فېسبوکپاڼه لیکلي چې په وېشل شویو پېژندپاڼو کې ۲۷۹زره او ۴۳۰ برښنايي او ۱۷۵زره او ۳۰۰ یې کاغذي پېژندپاڼې شاملې دي.
د سلاموطندار پښتو فېسبوکپاڼه وڅارئ
دې ادارې د هرات د احصايې او معلوماتو ریاست د رییس محبالله هدایت له قوله لیکلي چې هره ورځ شاوخوا ۲۴۰۰ کسان د برښنايي او کاغذي پېژندپاڼو اړوند خدمتونو ترلاسه کولو په موخه د دې رياست اړوندو دفترونو ته مراجعه کوي.
د احصایې او معلوماتو ملي اداې لیکلي: «تېرکال د يادو دفترونو له لارې توانيدلي چې ۲۷ زره او ۶۰۳ کسانو ته په کاغذي تذکرو کې د اصلاحاتو او ۴۹زره او ۷۶۶ نورو کسانو ته د ژوند پېښو (زېږون کارتونه، د مړینې پارچې، ودونو او طلاق ثبت) اړوند خدمتونه وړاندې کړي.»
د هرات د احصايې او معلوماتو رياست د معلوماتو پر بنسټ، په ياد ولايت کې د برښنايي پېژندپاڼو درې څانګې فعالې دي چې نارینه او ښځینه غوښتوونکو ته خدمتونه وړاندې کوي.
د احصایې او معلوماتو ملي ادارې همداراز ویلي چې یادې ادارې د هېواد په کچه د برښنايي پېژندپاڼو د وېش لړۍ لرېپرتو سیمو او ولسوالیو ته غځولې چې د یادو سیمو اوسېدونکي په اسانۍ سره کولای شي خپلې برښنايي پېژندپاڼېترلاسه کړي.