د اقتصاد وزارت په یوه مکتوب کې له ټولو کورنیو او بهرنیو غیردولتي موسسو غوښتنه کړې چې د خپلو تدارکاتي پړاوونو مخته وړو پرمهال د دغه وزارت استازي ته بلنه ورکړي.
د اقتصاد وزارت ویاند عبدالرحمان حبیب سلاموطندار ته وايي، د موسسو ټولو تدارکاتي پړاوونو کې د دغه وزارت د استازي شتون، د هغوی فعالیتونو کې رڼښت راولي او د مالیې ورکولو بحث روښانوي.
د سلاموطندار پښتو فېسبوکپاڼه وڅارئ
نوموړي وویل: «د پروژو پلي کولو برخه کې د روڼتیا رامنځته کولو لپاره دغه وزارت ټولو موسسو ته مالي متعهد استولی او دوی موظف دي چې ټولو لوجیستکي او ودانیزو تړونونو کې د یاد وزارت استازي ته د څارونکي په توګه بلنه ورکړي.»
له دې سره، د نادولتي موسسو یوشمېر استازي سره له دې چې د اقتصاد وزارت له نوي لارښود هرکلی کوي، خو وايي چې دغه کړنلاره د هغوی د تدارکاتو پروسې اوږدوي.
د یوې غیردولتي کورنۍ موسسې مسوول ضیاالدین سلاموطندار ته وویل: «یوه اداره، موسسه او بنسټ چې کار کوي، که هره پروسه کې د وزارت استازي ته بلنه ورکړل شي، ځکه ځینې پروژې ایمرجنسي دي، ستونزې پهکې پیدا کېږي، ټکنۍ کېږي او پروسې ځنډېږي.»
د اقتصادي چارو کارپوه شبیر بشیري هم وايي، که د اقتصاد وزارت نوې لارښوونه مثبتې پایلې ولري، د موسسو په فعالیتونو کې د شفافیت لامل کېدای شي، کنه نو دا د موسسو په کارونو کې لاسوهنه ده.
نوموړي وویل: «د ټولو موسسو فعالیتونو کې روڼتیا رامنځته کېږي، باید د کار کولو پایله یې وارزو چې څه مثبتې پایلې بهولري، ګنې، په کارونو کې به یې د لاسوهنې په معنې وي.»
د یادولو ده چې دامهال له اقتصاد وزارت سره ۲ زره ۳۹۳ غیردولتي موسسې چې ۲۷۲ یې بهرنۍ او ۲ زره ۱۲۱ یې کورنۍ دي، ثبت دي.
له دغو ۲ زره او ۳۹۳ موسسو څخه ۷۶۹ یې چې ۱۸۱ یې بهرنۍ او ۵۸۸ یې کورنۍ دي، په بېلابېلو ولایتونو کې فعالیت کوي.