د نیوزیلنډ او اسټرالیا د کرېکټ ملي لوبډلې د هند په کوربهتوب په روان نړیوال جام کې نن د یوه بل پر وړاندې لوبه کوي.
ټاکل شوې دغه لوبه نن له غرمې مخکې د ۹:۳۰ بجې د هند په «هېماچال پرادېش کرېکټ لوبغالي» کې ترسره شي.
د سلاموطندار پښتو فېسبوکپاڼه وڅارئ
نیوزیلنډ په روان نړیوال جام کې ښکلې لوبې کړي او په کړیو پنځو سیالیو کې یې یوازې یوه لوبه بایللې او پاتې یې ګټلې دي.
دغه لوبډله د جدول په درېیم ځای کې شتون لري. اسټرالیا له نیوزیلنډ ښکته څلورم ځای کې ده او کړیو پنځو سیالیو کې درې بریاوې او دوه ماتې لري.
د نیوزیلنډ او اسټرالیا د کرېکټ ملي لوبډلو ترمنځ په شویو وروستیو پنځو یو ورځنیو سیالیو کې بیا اسټرالیا برلاسې ده او ټولې لوبې یې ګټلې دي.
د داوړو لوبډلو لپاره دغه سیالي له دې امله مهمه ده چې نیمه پایلوبې ته د تلو لپاره خپل دریځ پیاوړی کولای شي.