د میدانوردګ محلي چارواکي وایي چې د موټرسایکل ځغلونې مرکزي فدراسیون له لوري له یاد ولایت څخه تر بامیانو پورې د موټرسایکل ځغلونې سیالۍ پيل شوې.
د میدانوردګ د والي مرستیال مولوي سیدالرحمن حافظ وایي چې دغه سیالیو کې د میدانوردګ او یوشمېر نورو ولایتونو شاوخوا ۱۵ لوبغاړو ګدون کړی چې له میدان ښار څخه به تر بامیانو ښار پورې واټن ووهي.
د سلاموطندار پښتو فېسبوکپاڼه وڅارئ
هغه زیاته کړه چې د دغه سیالیو موخه د ورزشکارانو ترمنځ د همغږۍ او تجربو شریکول او د ورزشکارانو ملاتړ کول دي.
د میدانوردګ ورزشکاران هم خوښ دي چې د موټرسایکل ځغلونې فدراسیون له لوري په دغه ولایت کې درې ورځينۍ سیالۍ پيل شوې.
دوي ټینګار کوي چې د موټرسایکل ځغلونې لوبغاړو ته په بیلابیلو برخو کې اسانتیاوې برابري شي.