د کډوالو او بېرته راستنېدونکو چارو وزارت مسوولان وايي چې تېر یوه کال کې یې له بېلابېلو هېوادونو د افغان کډوالو ۸۰۰ جسدونه هېواد ته رالېږدولي دي.
د دغه وزارت د مسوولانو په وینا، یاد افغانان د بېلابېلو لاملونو له کبله بهرنیو هېوادونو کې مړه شوي وو چې دې وزارت یې جسدونه هېواد ته انتقال کي دي.
د سلاموطندار پښتو برخه دلته وڅارئ
د کډوالو او بېرته راستنېدونکو چارو وزارت مسوولانو نن چهارشنبه د زمري اتلسمه ملت ته د دولت حساب ورکولو پروګرام کې د تېر یوه کال راپور وړاندې کولو پرمهال دغه څرګندونې کړې دي.
د یاد وزارت مسوولانو دې پروګرام کې وویل چې دوی تېر کال ۲۹۰۰ افغانان چې بهرنیو هېوادونو کې د انساني قاچاق ګواښ سره مخ وو، بېرته هېواد ته ستانه کړي دي.
د کډوالو او بېرته راستنېدونکو چارو وزارت مالي او اداري مرستیال محمدارسلا خروټي وویل: «تېر کال د دغه وزارت د څانګو له لارې د هېوادوالو ۸۰۰ جنازې چې بهرنیو هېوادونو کې وفات شوي وو، هېواد ته انتقال کړي دي.»
ملت د دولت حساب ورکولو پروګرام کې د یاد وزارت مسوولانو همداراز وویل چې دامهال هېواد کې درې میلیونه بېځایه شوي او شاوخوا اووه میلیونه افغانان هم له هېواده بهر کډوال دي.
د یاد وزارت د معلوماتو پر بنسټ، تېر کال ۹۵۲زره او ۵۸۹ کسان له بهرنیو هېوادونو بېرته هېواد ته ستانه شوي او ۱۶۰زره بېځایه شوي هم خپلو مېنو ته ستانه شوې دي.
د دغه وزارت ویاند عبدالمطلب حقاني وویل: «د کډوالۍ مسله بشري ده او نړۍ هم باید دې مسلې ته له بشري اړخه باید وګوري، له بده مرغه چې سیاسي استفاده کېږي، خو موږ ډېر راپورونه ترلاسه کړي چې د اوکراین له جګړې وروسته له افغانانو کورونه اخیستل شوي او اوکراینیانو ته ورکړل شوي دي.»
د کډوالو او بېرته راستنېدونکو چارو وزارت تېر کال نږدې ۳۰۰۰ افغان بندیان د پاکستان او شاوخوا ۱۰۰۰ بندیان د ایران له زندانونو ازاد او افغانستان ته سپارل شوي دي.