د اروپا ملتونو فوټبال جام سیالیو په لړ کې د اتریش پر وړاندې د لوبې پرمهال د فرانسوي بریدګر لوبغاړي کېلیان امباپې پوزه ماته شوې.
د نوموړي پوزه د اتریش فوټبال ملي لوبډلې دفاعي لوبغاړي کېوېن ډانسو سره د لوبې پرمهال تر لګېدو وروسته ماته شوې.
د سلاموطندار پښتو فېسبوکپاڼه وڅارئ
د کېلیان امباپې د پوزې له ماتېدو وروسته، کېوین ډانسو پر خپله اېکسپاڼه نوموړي ته د بېړنۍ روغتیا غوښتنه کړې او هیله یې ښودلې چې نوموړی به بېرته لوبغالي ته راوګرځي.
هغه لیکلي: «زه هغه «امباپې» ته ښه روغتیا غواړم اوهیله لرم چې هغه ژر تر ژره لوبغالي ته راستون شي. زه بښنه غواړم چې کیلیان ایمباپې زموږ د لوبې له امله ټپي شو.»
فرانسې دغه لوبه ۱-۰ وګټله.
د فرانسې فوټبال فدراسیون ویلي چې امباپې له روغتون راګرځېدلی او د نوموړي روغتیا د ډاډ وړ ده. فدراسیون زیاته کړې چې نوموړی به راتلونکې سیالي کې د پوزې خوندیتوب لپاره ماسک هم وکاروي.
فرانسه به د یاد جام د لوبو په لړ کې راتلونکې جمعه له پیاوړې نیدرلنډز لوبډلې سره سیالي وکړي.