د غزې په خان یونس کې د اسراییلو ځواکونو د جېټالوتکو په بریدونو کې د یوې کورنۍ پنځه غړیو خپل ژوند له لاسه ورکړی دی.
الجزیري خبري شبکې نن پنجشنبه، اکتوبر لسمه راپور ورکړی چې دغه کورنۍ د غزې سوېل د خان یونس په «الفخري» سیمه کې په نښه شوې.
د سلاموطندار پښتو فېسبوکپاڼه وڅارئ
د اسراییلي ځواکونو جېټالوتکو پر دې کور بمباري کړې چې د یادې کورنۍ، مور، پلار، د اووه میاشتنۍ ماشومې په ګډون درېوو ماشومانو پهکې خپل ژوند له لاسه ورکړی دی.
بلخوا د غزې په جبالیه کډوالو کمپ کې هم د اسراییلو په بریدونو کې درې کسانو خپل ژوند له لاسه ورکړی دی.
له نږدې یوې اوونۍ راهیسې د غزې شمال کې د اسراییلي ځواکونو د کلابندۍ له امله ملګري ملتونه اړ شوي چې دې سیمو کې روغتونونه او ښوونځي وتړي.
له هغه وخت راهیسې چې اسراییلو پر غزې خپل برید پیل کړی، د بریدونو له امله ۴۲۰۱۰ کسان وژل شوي او نږدې ۹۸زره کسان ټپیان دي.