د ایران ولسمشر مسعود پزشکیان له اسراییل او امریکا سره د جګړې پایته رسولو او سولې لپاره درې شرطونه وړاندې کړي.
الجزیرې شبکې نن پنجشنبه د حوت ۲۱ / مارچ ۱۲ راپور ورکړی چې د ایران د مشروع حقونو پیژندل، د تاوان ورکول او راتلونکې کې د برید نهکولو نړیوال تضمینونه د ولسمشر پزشکیان له لوري وړاندې شوي شرطونه دي.
پزشکیان ویلي: «د جګړې چې اسراییل او امریکا پیل کړې، د پایته رسولو یوازینۍ لار د ایران د مشروع حقونو پیژندل، د تاوان ورکول او راتلونکې کې د برید نهکولو پر وړاندې نړیوال تضمینونه دي.»
د ایران ولسمشر زیاته کړې چې هر ډول پریکړهلیک باید د دغه هېواد اساسي حقونه تایید او د نورو بریدونو نهکولو په وړاندې کلک ډاډ ورکړي.
همدارنګه ویل شوي چې د ایران ولسمشر دغه څرګندونې د روسیې او پاکستان له مشرانو سره د ټیلیفوني خبرو په جریان کې کړي چې د سولې لپاره د ایران ژمنتیا تاییدوي.