د لوګر مرکز پلعلم ښاروالي چارواکي وایي چې په تېرو شپږو میاشتو کې یې څه باندې ٢٢ میلیونه افغانۍ عواید راټول کړي دي.
د پُلعلم ښاروالي چارواکو دغه څرګندونې نن «چهارشنبه، لیندۍ اتمه» د یاد ولایت مرکز پلعلم ښار کې ولس ته د حساب ورکولو په نوم جوړه شوې غونډه کې کړې دي.
د پلعلم ښاروال محمداسحاق سعید دې غونډې ته وویل چې د ١٤٠٢ کال د لومړۍ او دویمې ربع په لړ کې یې د څه باندې ١٨میلیونه ثابت عواید او دغهراز څه باندې ۴ میلیونو غیرې ثابت عواید راټول کړي دي.
د نوموړي په وینا، نږدې ۱۲۰۰صنفي جوازونه وېشل شوي او همداراز له ٣٠ میلیونو افغانیو څخه زیات عواید یې پر ځینو ادارو پاتې دي.
هغه زیاته کړه چې پلعلم ښاروالي د ښار د سرسبزۍ او پراختیا لپاره په تېرو شپږو میاشتو کې کڼې پروژې پلې کړي او هڅه روانه ده چې د یادو پروژو شمېر دوه برابره شي.