د پکتيکا مرکز ښرنه کې د ترکيې د یوه خيريه بنسټ له لوري د ۵۰۰زره امريکايي ډالرو په لګښت د امام بخاري په نوم يو دارلايتام جوړ او ګټېاخيستنې ته سپارل شوی دی.
دغه دارلایتام په درېوو پوړونو کې جوړ شوی او شاوخوا ۴۰۰ یتیمان به پهکې زدهکړې وکړي.
د سلاموطندار پښتو فېسبوکپاڼه وڅارئ
د دغه دارلايتام مشر مولوي صلاحالدين کامران وويل چې په ياد دارلايتام کې به زدهکوونکو ته د ديني زدهکړو ترڅنګ عصري زدهکړې هم ورکړل شي.
نوموړي وويل:«په دې دارلايتام باندې ۵۰۰ زره ډالر لګښت شوی، ټول سهولتونه پهکې برابر دي. په درېوو پوړونو کې جوړ شوی. لومړی تداوي لپاره کلینیک هم پهکې شته، د ليلې لپاره هم ځانګړي اطاقونه لري. دلته به ديني زدهکړو ترڅنګ عصري او کمپيوټر زدهکړې هم ورکول کېږي.»
د دارلايتام د پرانيستې مراسمو کې د ترکيې د جمعيت ندالخير بنسټ مشر امره کايدا بيا ژمنه وکړه چې افغانستان کې به اړمنو او يتيمو ماشومانو ته د بشري مرستو ترڅنګ د زدهکړو زمینه هم برابره کړي.
هغه وویل: «دلته موږ د شل کلنې جګړې څخه په زرګونه يتمان پاتې شوي، لکه څنګه چې موږ د بيارغونې په برخه کې کار کوو، همداشان غواړو چې افغانستان کې د خپلو وروڼو د کونډو او يتيمانو ترڅنګ ودرېږو او داسې پروژې ورته اجرا کړو چې دوی درد دوا کړي.»
د پکتيکا مرستيال والي مولوي مخدوم عبدالسلام سعادت بیا دې مراسمو ته وويل چې يتيمو ماشومانو ته د ژوند هر ډول اسانتياوو ترڅنګ د زدهکړو زمينه هم برابروي.
هغه ټينګار وکړ چې د سرپرست حکومت مشرتابه هوډ لري، ټول هېواد کې د يتيمانو روزنې لپاره دارلايتامونه جوړ کړي.
په ورته وخت په ياد دارلايتام کې يوشمېر زدهکوونکو هم خوښي وښوده چې د زدهکړو لپاره ورته زمينه برابره شوې.