د ملګروملتونو سرمنشي انتونیو ګوترېش د امریکا او ایران ترمنځ د دوه اوونیو له اوربند هرکلی کړی دی.
ګوټرش نن چهارشنبه (د اپرېل ۸مه) له ښکېلو لورو وغوښتل چې د نړیوالو اصولو پربنسټ خپلو ژمنو ته پابند پاتې شي.
هغه ټینګار کړی چې د جګړو ژر پای ته رسول، د ملکي وګړو د ژوند د خوندي کولو او د بشري کړاوونو د کمولو لپاره بېړنی اهمیت لري.
د ملګروملتونو سرمنشي همدارنګه د پاکستان او نورو هغو هېوادونو له هڅو مننه کړې چې د دې اوربند په رامنځته کولو کې یې مرسته کړې ده.
سلاموطندار پر اېکسپاڼه هم وڅارئ
د سلاموطندار پښتو فېسبوکپاڼه وڅارئ
په ورته وخت کې، د امریکا ولسمشر ډونالډ ټرمپ ویلي چې د دوه اوونیو اوربند وړاندیز یې په دې شرط منلی چې د هرمز تنګی پرانیستی پاتې شي.
بلخوا، د پاکستان لومړي وزیر شهباز شریف تایید کړې چې دا اوربند د اسلاماباد په منځګړیتوب شوی او ټاکل شوې چې راتلونکې خبرې اترې به په اسلاماباد کې وشي.
کارپوهان وایي، که څه هم دا اوربند لنډمهاله دی، خو کولای شي د لاپراخو ډیپلوماټیکو هڅو لپاره زمینه برابره کړي.