د لوګر د بدني روزنې او ورزش امریت مسوولان وایي چې د فوتسال فدراسیون په همکارۍ د دغه ولایت په څرخ ولسوالي کې د ۳۰ غوره لوبډلو ترمنځ د فوتسال سیالي پای ته ورسېدې.
د دغه ولایت د بدني روزنې او ورزش امریت امر انجینیر مزمل نعیمزي سلاموطندار ته وویل، د فوتسال دغه سیالي د ولایت په کچه د ۳۰ غوره لوبډلو ترمنځ د څرخ ولسوالي په «مولانا یعقوبي څرخ جمنازیم» کې جوړې شوې چې یوه اوونۍ یې دوام وکړ.
نوموړي زیاته کړه، د یادو سیالیو پای لوبې ته د لوګر د خورشید نوشهر او سیدانو لوبډلو لاره موندلې وه چې خورشید نوشهر لوبډلې وکولای شول خپلې سیالې لوبډلې ته ماته وکړي او اتلولي په خپل نوم کړي.
نعیم زي زیاته کړه، د یادې سیالۍ له جوړیدو څخه موخه لوګر ولایت کې فوتسال ورزش ته وده ورکول، د ورزشکارانو ترمنځ د تجربو شریکول او همغږۍ رامنځته کول وو.
سلاموطندار پر اېکسپاڼه هم وڅارئ
د سلاموطندار پښتو فېسبوکپاڼه وڅارئ
د جوړو شویو سیالیو یوه ګډونوال احمد ولید سلاموطندار ته وویل، دا ډول سیالۍ کولای شي چې د لوګر ولایت په کچه د فوتسال ورزشکارانو ترمنځ اړیکې او ظرفیت کچه لوړه کړي.
هغه د فوتسال په فدراسیون غږ وکړ چې د لوګر ولایت ورزشکارانو شته ستونزو ته رسیده ګي وکړي او د ورته سیالیو جوړیدو زمینه ورته برابره کړي.
هېره دې نه وي چې د یادو سیالیو په پای کې په غوره لوبډلو او لوبغاړو بېلابېلې ډالۍ هم ووېشل شوې.