د پاکستان په خېبرپښتونخوا ایالت کې پولیس وايي چې د یاد ایالت اړوند سیمو کې د خپلمنځي شخړو له امله اته کسان وژل شوي دي.
د پولیسو په وینا، لومړۍ پېښه کې چې د یاد ایالت په مردان سیمه کې رامنځته شوې، یوه کس خپل پلار او دوه ورونه په ډزو وژلي او مور یې ټپي کړې ده.
د سلاموطندار پښتو فېسبوکپاڼه وڅارئ
د پاکستاني رسنیو د راپور له مخې، پېښه چهارشنبه، جون ۱۹مه رامنځته شوې چې دغه کس هم وروسته خپل ځان وژلی دی.
رسنیو د پولیسو له قوله ویلي چې دغه پېښه د کورني تاوتریخوالي له امله رامنځته شوې. پولیسو خپلو لومړنیو څېړنیو کې په ډاګه کړې چې دغه کس رواني ستونزې درلودې او په کوچنۍ خبره به یې کور کې شخړې کولې.
بلخوا د راپورونو له مخې، د خېبرپښتونخوا ایالت په جمرود کې هم د دوو کورنیو ترمنځ د شخړې له امله څلور کسان وژل شوې دي.
پولیسو په وینا، نښته د ملکیت پر سر د تره زامنو ترمنځ شوې چې له کبله یې څلور کسان پهکې وژل شوي دي.
دغه پېښې داسې مهال رامنځته کېږي چې له دې وړاندې هم دغه ایالت او د پاکستان په نورو سیمو کې هم ورته پېښې شوي چې له کبله یې ځینو کسانو خپل ژوند له لاسه ورکړی او ځینې یې ټپیان شوې دي.