د کندهار ښار د ښاري نظم د ټینګښت لپاره د ترافيک پوليسو شمېر زیات شوی او د ښار پر مهمو داخلي لارو، چوکونو او ګڼمېشتو سیمو کې د څار او کنټرول بهیر پیاوړی شوی دی.
محلي مسوولان وایي، د موټرچلوونکو لهخوا د ترافيکي څراغونو نهمراعت، بېاحتیاطي او ناقانونه موټرچلونه د ښار د بېنظمۍ اساسي لاملونه دي چې له امله یې وخت ناوخته ټرافیکي پېښې رامنځته کېږي.
د کندهار ښاروالي مسوولان وایي چې دا اقدام د ترافيکي ګډوډۍ د کمولو لپاره اغېزناک تمامېدای شي. د کندهار ښاروالي ویاند سیفالله عاصم وايي: «موږ یو ډول ځانګړي جمپونه نصب کړي چې د ټرافیکي ګڼې ګوڼې مخنیوي کې به مهم رول ولوبوي، که یې نتیجه مثبته وه، موږ یې شمېر په کندهار ښار کې نور هم زیاتوو.»
بلخوا د کندهار ښار یوشمېر اوسېدونکي وايي، که موټرچلونکي ترافيکي اصول په سمه توګه مراعت کړي، د ګڼېګوڼې او د ډېری پېښو مخه به ونیول شي.
د کندهار ښار اوسېدونکی سمېع عمري وايي: «ټرافیکي څراغونه مراعتول د ټرافیکي قوانینو مراعت دی، که چېرې ټرافیکي قوانین مراعت شي، ټرافیکي پېښې خپله کنټرولېږي.»
سلاموطندار پر اېکسپاڼه هم وڅارئ
د سلاموطندار پښتو فېسبوکپاڼه وڅارئ
د کندهار ښار یو بل اوسېدونکی د یادو جمپونو د ګټو یادونه کوي او وایي، دا ډول فزیکي خنډونه د ټرافیکي قوانینو په عملي کېدو کې مرسته کوي.
علي محمد وویل: «دا جمپونه ډېر ښه دي، دا د ټرافیکي پېښو مخنیوي کې مهم رول لوبوي. دا اغزن او ځانګړي جمپونه پر یو طرفه سړکونو یوازې له یوې خوا نقلیه وسایطو ته د تګ اجازه ورکوي.»
د کندهار ترافيک پوليس ټینګار کوي چې له دې وروسته به د هغو کسانو پر وړاندې جدي او قانوني چلند کېږي چې ترافيکي اصول نه مراعتوي، پر یو طرفه سړکونو تګراتګ کوي او یا هم د ترافيکي څراغونو سپکاوی کوي.
د ترافيک مديریت مسوولان وایي، دا ډول سرغړونې د عامو خلکو ژوند له خطر سره مخ کوي. د کندهار د ترافيکو مدير خیال محمد غاور وايي: «زموږ دریځ قاطع دی، هغه موټر نیسو چې ټرافیکي اصول نه مراعتوي او د عامو خلکو د ژوند د ازار سبب ګرځي.»
د کندهار ترافيک پوليسو په وینا، د ترافيکي پېښو د کمولو لپاره یې د موټرچلونې زدهکړې جبري کړي او د کم عمره کسانو له لوري پر موټرچلونې یې بندیز لګولی دی.